Senn tekur að líða að því að sumir ferðaþjónustustaðir í Hornafirði fari að loka eftir gott sumar, nokkrir hafa opið allt árið. Samkvæmt lauslegri talningu upplýsingaþjónustunnar í Nýheimum munu um 130 þúsund ferðamenn, að lágmarki, hafa heimsótt Sveitarfélagið Hornafjörð í sumar. Ekki er til heildarskráning ferðamanna frá fyrra ári en ljóst er að mikið meiri aðsókn er að Jöklasafninu en var í fyrra . Guðrún Ingimundardóttir starfsmaður Jöklasýningar og upplýsingaþjónustunnar segir að sú breyting að hafa líka opið á morgnana og lengja opnunartímann hafi komið vel út því stundum hafi komið 2-3 ferðahópar fyrir hádegi. Hún segir að ferðaskrifstofur séu farnar að hafa Lesa meira

Gangagröfturinn gekk mjög vel í síðustu viku og afköst vikunnar voru 104 m. Þessi afköst eru í raun með ólíkindum því bergið var mjög leiðinlegt mest alla vikuna og mikið þurfti að styrkja með ásprautun og bergboltum (10-15 m3 af steypu og 20-30 bergboltar í hverja sprengifæru). Þetta er mesta heildarframleiðsla sem nokkurn tíma hefur náðst í sprengdum göngum á landinu. Göngin eru nú orðin 757 m að lengd að sunnan plús 5 m að norðan - samtals 762 m eða 66,3% af heildarlengd. Lesa meira

Þó kvartað sé yfir lélegri kræki-og bláberjasprettu er ekki sömu sögu að segja hvað rifsber og sólber snertir, þar er mikill vöxtur. Brynja Hannesdóttir í Grænahrauni segir að uppskera sól- og rifsberja sé mjög góð, t.d. fékk hún um 18 kg af rifsberjum af þrem plöntum og vöxtur sólberjanna var enn betri en rifsberjanna. Brynja hefur í mörg ár ræktað vínber í sólstofunni hjá sér og fær um 20 kg af vínberjum á hverju hausti og þegar best lætur hefur hún fengið allt upp í 26 kg. Vínberin eru ekki orðin fullþroskuð en útlit er fyrir góða vínberjauppskeru með haustinu. Lesa meira

Skólinn í Hofgarði í Öræfum er fámennasti skólinn í Sveitarfélaginu Hornafirði a.m.k. í byrjun skólaárs. Skólinn var settur fyrir viku og er skólastarf að komast í sinn fasta farveg. Við höfðum samband við Pálínu Þorsteinsdóttur skólastjóra í Hofgarði og spurðum hana hvernig skólastarfið gengi fyrir sig í svona fámennum skóla: ,,Skólinn okkar er samkennsluskóli og við kennum frá kl. 9 – 15 alla virka daga, en yngstu börnin fara þó heim um hádegið á föstudögum. Kennarar eru þrír og að auki einn starfsmaður leikskólans. Lesa meira

Nemendur og kennarar Hrollaugsstaðaskóla eru mættir í skólann til starfa á þessu hausti. Í skólanum í vetur eru 9 nemendur á aldrinum 5 - 12 ára og kennarar eru tveir. Fyrstu dagarnir eru notaðir til aðlögunar þar sem námið fer fram utandyra eftir því sem aðstæður leyfa segir Þorbjörg Arnórsdótir skólastjóri. Farið er til berja, hreyfing stunduð, farið í sund og jafnvel fjallgöngu. Í gær fimmtudag fórum við í Öræfin að heimsækja skólann þar og á eftir var farið saman í sund í Flosalaug og var ferðin öll mjög skemmtileg. Nú á haustdögum á að nota tímann til að rannsaka plöntur og læra um blómin í haganum, jafnvel skreppa til berja smástund og njóta áfram þessa góða sumars, þrátt fyrir að skólinn sé byrjaður.Síðan á að vinna þemaverkefni um blóm og reyna þannig að flytja sumarið með sér inn í haustið og veturinn. Lesa meira

Nú þegar haustar og dimmir kemur sá tími að yngri börnin eru meira inni og njóta þess að heyra sögur og jafnframt ágætt að hvíla þau aðeins frá sjónvarpinu. Undanfarna vetur hefur Menningarmiðstöðin verið með sögustundir fyrir börn einkum þau yngri og hafa þessar stundir verið vinsælar og vel þegnar. Nú er sögustundin að byrja aftur öflugri og skemmtilegri en nokkru sinni. Á bókasafninu í Menningarmiðstöðinni er góð aðstaða fyrir börn á öllum aldri og margt í boði. Á fimmtudögum í vetur eru börn á aldrinum 3 – 6 ára sérstaklega velkomin, því þá er í boði notaleg, fróðleg og umfram allt skemmtileg sögustund í umsjón Ragnhildar Guðmundsdóttur. Lesa meira

Getraunastarf Sindra hefur verið blómlegt, farið fram úr björtustu vonum segir Gestur Halldórsson sem sér um Tippstofu Sindra. Í gærkvöldi heimsótti Torfi Ásgeirsson frá Reykjavík Sindra, hélt fyrirlestur um getraunir og kenndi þeim á Vingetto getraunaforritið. Torfi sagði að með notkun forritsins væri hægt að spara mikla peninga og fá meiri skemmtun af getrauninni því auðvitað sé markmiðið, að hafa gaman að þessu. Megin kost segir hann vera, að hér sé sölukerfið fyrir ungmennafélagið Sindra og það styrki félagið sú þátttaka sem hér fari fram. Sindri er með þeim hæðstu af landsbyggðinni og þeir fjölmennustu þ.e. mestur fjöldi einstaklinga og jafnvel þó Reykjavík væri talin með. Þetta sýnir hvað þið eruð miklu þroskaðri en aðrir, bætti Torfi við og brosti. Lesa meira

Nýr ferðaþjónustustaður verður opnaður í Vesturhúsi á Hofi í Öræfum á næsta ári.. Það er fyrirtækið Öræfin ehf sem að þessu stendur og eru það eigendur þess Guðjón Marteinsson og Einar Torfi Finnsson ásamt fjölskyldum þeirra sem keypt hafa Vesturhús. Þeir félagar hafa báðir starfað mikið í ferðaþjónustu og þekkja vel svæðið, Guðjón er leiðsögumaður og Einar Torfi er með Íslenskum Fjallaleiðsögumönnum. Við stefnum á að byrja í febrúar og ætlum að hafa opið allt árið segir Guðjón. Lesa meira

Kartöflubændur í Hornafirði o.fl. fagna rigningunni sl. sólarhring þar sem allur gróður var orðinn alltof þurr og eins kartöflugarðarnir. Þrátt fyrir allt þetta þurrviðri lítur samt mjög vel út með kartöflusprettu, enn betur en í fyrra segir Birna Jensdóttir á Seljavöllum. Þar á bæ er búið að taka upp um 50 tonn af kartöflum aðallega gullauga og einnig rauðum íslenskum. Talsvert er um stórar kartöflur og er stærsta kartaflan sem komið hefur núna 372 gr. gullauga. Mestur vöxtur er venjulega í premíu bökunarkartöflum sem eru teknar upp síðastar á haustin. Uppskeran fer jafnóðum í sölu, kartöflurnar eru þvegnar og sendar daginn eftir til kaupenda í Reykjavík. Kartöflurnar sem núna fara í sölu eru óflokkaðar en þegar líður á haustið og híðið farið að þéttast eru þær flokkaðar í 3 flokka, smælki, meðal- og svo stórar kartöflur. Sjö manns eru við kartöfluupptökuna á Seljavöllum. Lesa meira

Hægt og bítandi fækkar einbreiðum brúm á hringveginum. Á leiðinni frá Reykjavík til Hornafjarðar eru ennþá 26 einbreiðar brýr, sú vestasta á Jökulsá á Sólheimasandi og á Hoffelsá austast og 14 frá Höfn að Streitishvarfi. Reynir Gunnarsson hjá Vegagerðinni segir að í hans umdæmi, sem nær frá Gýgjukvísl á Skeiðarársandi að Streitishvarfi, séu 33 einbreiðar brýr og er það mun meira en er annarsstaðar á landinu. Reynir segir að ástæðan fyrir þessu er sú að á þessu svæði eru miklu fleiri og stærri vatnsföll en annarsstaðar og miklu dýrari brúarframkvæmdir. Hann telur líklegt að næst verði teknar fyrir brýrnar á Smyrlabjargará og Gljúfurá, þær eru minnstar og líkur á að þær verði settar í hólka, en þetta skírist allt þegar ný vegaáætlun kemur í haust. Lesa meira

Sr. Fjölnir Ásbjörnsson sem ráðinn hefur verið til að leysa sr. Sigurð Kr. Sigurðsson sóknarprest á Hornafirði af í vetur er kominn til Hafnar ásamt fjölskyldu sinni. Hans fyrsta embættisverk verður að messa í Stafafellskirkju í Lóni næstkomandi sunnudag kl 14.00. Fjölnir hefur notað síðastliðna daga til að koma sér fyrir í prestbústaðnum á Hlíðartúni 18 og segist hann hlakka til að takast á við verkefni vetrarins. Lesa meira

Nesjaskóli var settur úti undir berum himni í blíðskaparveðri í gær, mánudaginn 23. ágúst. Í vetur eru nemendur við skólann 95 í sex bekkjardeildum. Þar af eru 26 sem eru að hefja sína grunnskólagöngu. Skólastarfið mun verða með nokkuð hefðbundnum hætti þar sem lögð verður áhersla á að veita góða almenna menntun með áherslu á vellíðan nemenda í leik og starfi. Unnið verður áfram með verkefnið ,,heilsuskólinn” en markmið þess verkefnis er að efla líkamlegt- andlegt- og félagslegt heilbrigði allra í skólanum. Vinna með nýtt námsefni, ,,Stig af stigi” og stöðug vinna gegn einelti er mikilvægur þáttur í þessari heilsueflingu. Nýir starfsmenn við skólann eru, Eva Lind Björnsdóttir, Guðný Böðvarsdóttir, og Signý Ingvadóttir sem allar eru stuðningsfulltrúar og Halldóra Guðmundsdóttir kennari. Lesa meira

Mikið hefur verið rætt og ritað í helstu fjölmiðlum landsins um þá miklu berjasprettu sem væri um allt land. Staðreyndin er samt sú að á Austur og Suðaustur landi er lítið af berjum samkvæmt heimildum berjafróðra manna. Til eru þó undantekningar því eitthvað finnst í Suðursveit og á einstaka stað í Öræfum. Gönguhópur aldraðra á Hornafirði brá sér í berjaferð í landi Flateyjar á Mýrum og lét vel yfir afrakstrinum “ Ég hef ekki séð það öllu svartara” sagði Helga Magnúsdóttir, ein úr hópnum, það var mjög mikið af krækiberjum þarna á aurunum en engin bláber og við vorum skotfljót að fylla ílátin. Haft var samband við fólk á mörgum stöðum frá Hornafirði og austur um firði og allstaðar var sama svarið “Hér er ekkert af berjum, hvorki krækiber eða bláber,” og ef einhver hafði fundið nokkur krækiber þá voru þau lítil bæði á stærð og bragð. Lesa meira

Búfénaður hefur valdið skemmdum á golfvellinum í Silfurnesi einkum eru það kindur hafa sótt í svæði (grínin) sem búið er að sá í, étið nýgræðinginn og spyrnt upp jarðveginum. Guðný Helgadóttir í Golfklúbbi Hornafjarðar segir að daglega þurfi að reka kindur af vellinum en þær komi jafnharðan aftur. Guðný segist ekki vera fjárglögg en telur að þetta séu alltaf sömu kindurnar. Síðast þegar smalað var af vellinum voru kindurnar settar í rétt sem er þar skammt frá og bæjaryfirvöldum og lögreglu tilkynnt það með beiðni um að sjá til þess að eigandi þeirra sækti þær. Kindur eru mikið við og á þjóðveginum rétt innan við Höfn og eins hafa þær gert sig heimakomnar í bænum. Okkur er ekki ljúft að smala kindunum út á þjóðveginn þaðan sem þær koma því það getur haft afdrifaríkar afleiðingar fyrir vegfarendur. Guðný segir að Golfklúbburinn hafi sent bæjarstjórn bréf þar sem þess er óskað að tekið verði á þessum málum um lausagöngu búfjár en ekki hafi borist neitt svar. Í bréfi Golfklúbbs Hornafjarðar kemur fram að ítrekað hefur þurft að reka sauðfé og hross af svæði félagsins og að miklar skemmdir hafi orðið á þeim svæðum sem nýlega var sáð í. Lesa meira

Opna Hótel Hafnarmótið í golfi var spilað núna um helgina þ.e. Laugardag og Sunnudag, í blíðskaparveðri og Hornafjörður skartaði sínu fegursta. Úrslit mótsins urðu Þessi: Konur með forgjöf: 1 . sæti Guðný Helgadóttir 64 puntar 2. sæti Guðrún Júlía Jónsdóttir 57 puntar 3. sæti Guðrún E. Þorsteinsdóttir 55 puntar 4. sæti Unnur Sæmundsdóttir 53 puntar 5. sæti Guðný Jensdóttir 47 puntar Lesa meira

Stefnt er á að slátrun sauðfjár hjá sláturhúsinu á Höfn byrji 20. sept. Í haust er áætlað að slátrað verði þar um 25 þúsund fjár sem er aðeins minna en var síðasta haust. Ekki eru komnar neinar fastar tölur frá bændum um sláturfé, en Einar Karlsson sláturhússtjóri á von á að fé komi af sama svæði og í fyrra þ.e eitthvað úr Vestur- kaftafellssýslu, af svæðinu hér og einnig eitthvað af svæðinu austur í Breiðdal. Ekki varð neitt af sumarslátrun þar sem ekki fengust nógu margir dilkar til að farið yrði á stað með slátrun. Undanfarin ár hafa nokkrir Bretar komið til vinnu í sláturhúsinu og verður svo einnig núna. Einar sláturhússtjóri er ekki bjartsýnn á að vel gangi að fá mannskap í sláturhúsið, ekki frekar en hjá Húsvíkingum þar sem helmingur starfsfólksins eru útlendingar. Það er af sem áður var þegar fólk sóttist eftir að komast í vinnu í sláturhúsinu. Lesa meira

Kvikmyndin Epíð verður frumsýnd í Nýheimum Hornafirði á morgun, laugardag 21.ágúst kl. 20.00 og 22.00. Mynd og handrit er eftir Hornfirðingana Daníel Imsland og Hlyn Pálmason. Efni myndarinnar er sótt í fornar sagnir um örlög og goðsagnir. Leikarar eru um 20 og í aðalhlutverkum eru Elvar Ágústsson og Óskar Guðjón Óskarsson einnig sjást þar margir aðrir þekktir Hornfirðingar. Myndin er tekin í nágrenni Hafnar og hafa Daníel og Hlynur séð alfarið sjálfir um handrit, myndatökur og alla gerð myndarinnar. Þeir félagar hafa lengi fengist við stuttmyndagerð, eða frá því að þeir voru smáguttar eins og þeir orða það og sl vetur komst stuttmynd eftir þá í 16 liða úrslit hjá Popp Tíví þar sem úrskurðað var um bestu myndina með SMS skilaboðum. Lesa meira

Albert Eymundsson bæjarstjóri á Höfn var heiðraður fyrir störf sín í þágu knattspyrnu á Íslandi og fór sú athöfn fram á Laugardalsvelli áður en leikur Íslands og Ítalíu hófst. Alþjóða knattspyrnusambandið á 100 ára afmæli á þessu ári. Í tilefni þess, segir Eggert Magnússon formaður KSÍ., er verið að heiðra einn mann úr hverju aðildarlandi sambandsins, mann sem hefur þótt skara framúr í sambandi við uppbyggingu á knattspyrnu í sínu heimahéraði, grasrótarstarfi eins og við köllum það, hvort sem það er fyrir stráka, stúlkur,karla eða konur og fyrir að hafa verið einstaklega jákvæður alla tíð og tíma gagnvart knattspyrnustarfinu og þessari uppbyggingu hvað sem á hefur gengið. Okkur bar að velja einn einstakling á Íslandi sem við teldum eiga þetta skilið og sá maður er Albert Eymundsson, sem okkur þykir vera algjör fyrirmynd um alla þessa hluti og okkur finnst prýða knattspyrnuforustumann. Hann hefur starfað á öllum þessum sviðum, verið leikmaður, þjálfari og forustumaður og kynnst þar öllum hliðum, allstaðar verið sama góðmennið, jákvæður út í alla hluti og alla staði og fyrirmynd annarra í öllum þessum störfum. Eggert segir það hafa verið sérstaklega ánægjulegt og gaman að geta heiðrað Albert fyrir framan 20 þúsund manns rúml. á íþróttavellinum sem allir klöppuðu honum lof í lófa. Lesa meira

Karlakórinn Jökull byrjar starfsemi sína snemma þetta árið en það er æfingar fyrir upptökur vegna útgáfu geisladisks. Upptaka fer fram nú snemma á haustdögum og mun Sigurður Rúnar Jónsson (Diddi fiðla) sjá um upptöku á þessum disk en hann sá einnig um upptöku á disknum Lesa meira

Gangagröftur hér í Almannaskarði gengur vel sem fyrr. Framvindan í síðustu viku var um 95 m og eru göngin orðin 563 m að lengd eða um 49% af heildarlengd. Þetta verður að teljast mjög gott þar sem hlé var gert eina vakt á miðvikudaginn vegna áhafnaskipta hjá Leonhard Nilsen. Auk þess var um 4 klst stopp á laugardaginn vegna vélarbilunar. Fyrsta sökkulsteypan í vegskála að norðanverðu var steypt í gær, sunnudag. Alls voru steyptir 24 m af undirstöðu vinstra megin. Lesa meira

Framkvæmdir við sparkvöllinn við Heppuskóla ganga vel og í lok þessarar viku verður völlurinn tilbúinn undir gerfigraslagningu. Magnús Jónasson segir að stefnt hafi verið á að hafa allt tilbúið 20.ágúst, en ekki er ljóst hvenær það verður. Það eru erlendir aðilar sem sjá um graslagninguna og munu þeir leggja gerfigras á 40 sparkvelli víða um landið, aðallega á suð-vestur og norðurlandi. Völlurinn er við hlið íþróttahússins og er rúmum meter lengri en húsið og mörkin eru 2 x 3 m, svokölluð handboltamörk. Girðing er allt í kring um völlinn og með því er verið að hugsa um að bæta sem best aðstöðuna fyrir yngri krakkana en völlurinn verður öllum opinn. Lesa meira

Það hefur viðrað vel til ferða á grasafjall undanfarið og ekki síður til að þurrka grösin þegar heim er komið. Heimir Þór Gíslason á Höfn, sem löngu er landsþekktur fyrir fjallagrasatínslu, var í eina viku á Jökuldalsheiði um daginn og var afraksturinn eftir vikuna um 100 kg af fjallagrösum. Það er eitthvað sem tilheyrir síðsumardögum hér á Hornafirði að sjá Heimir Þór Gíslason breiða fjallagrös til þerris á kartöfluhúss-túninu, hræra í þeim með hrífunni og taka saman þegar allt er orðið sprekþurrt. Grösin sem Heimir er að ganga frá núna eiga að fara til Bandaríkjanna, ef þau komast þá í gegnum allt þetta kerfi, segir hann, það er svo mikil skriffinnska við þetta og m.a.þarf vottorð um að ekki leynist sprengja í grasapakningunni, Mér líst ekkert á að ég skuli þurfi vottorð frá löggildum embættismanni um að þetta innihaldi ekkert hættulegt, en svona verður þetta víst að vera segir Heimir. Lesa meira

Skólarnir eru flestir að byrja í næstu viku og í nógu að snúast einkum hjá þeim sem ætla í skóla utan heimabyggðar. FAS, Framhaldsskólinn í Austur-Skaftafellssýslu byrjar mánudaginn 23. ágúst og verður skólinn settur klukkan 11 og að setningu lokinni er hádegisgrill í boði skólans. Kennsla hefst síðan samkvæmt stundaskrá þriðjudaginn 24. Í gær, 17. ágúst voru um 110 nemendur skráðir í dagskóla og um 40 í kvöldskóla. Við þá tölu eiga eftir að bætast fjarnemendur og aðrir sem eru að taka einn og einn áfanga. Nemendur beint úr grunnskóla eru 29. Námsframboð er fjölbreytilegt. Hægt er að velja á milli 8 námsbrauta í dagskóla og tveggja í kvöldskóla. Vinsælustu brautirnar eru félagsfræðibraut, náttúrufræðibraut og almenn braut. Kennarar í fullum stöðum verða þeir sömu og síðasta vetur en til viðbótar koma tveir nýir, einn í raungreinar og tungumál. Auk þess verður einn stundakennari við skólann. Í vetur verður lögð áhersla á að efla félagslíf nemenda svo og ungmenna á aldrinum 16 til 25 ára. Um er að ræða samvinnuverkefni margra aðila undir forystu Menningarmiðstöðvarinnar. Lesa meira

Kammersveitin Ísafold skemmtir í Nýheimum á Höfn nk. föstudag kl 20.00 . Þetta er í annað sinn sem Kammersveitin Ísafold sækir Hornfirðinga heim. Tónleikarnir fyrir ári síðan eru áheyrendum eftirminnilegir fyrir að vera kraftmiklir og gefandi eða eins og segir í gagnrýni Mbl. 23. ágúst 2003: “..allt leikið af stakri innlifun og hrífandi snerpu.” Hljóðfærin sem þau leika á eru fiðlur, lágfiðla, knéfiðla, kontrabassi, flauta, óbó, klarinett, fagott, horn, trompet, básúna, harpa, píanó og slagverk. Hljómsveitarstjóri er Daníel Bjarnason. Þar sem nær allir meðlimir Ísafoldar eru í námi erlendis er hljómsveitin aðeins starfandi á sumrin. Meðlimir hljómsveitarinnar í sumar, 2004, eru 18 talsins. Það er líka gaman að geta þess að Hljómsveitin Ísafold sá um undirleik á lagi Egils Jónssonar, Hornafjörður, fyrir Karlakórinn Jökul á væntanlegum disk þeirra í haust og karlakórinn mun syngja það lag með þeim á tónleikunum. Lesa meira

Í sumar voru boðnar út framkvæmdir við dýpkun á innsiglingunni við Hornafjarðarós en engin tilboð bárust í verkið. Var þá leitað aðila til að taka verkið að sér og nú hafa samningar tekist við Gámaþjónustu Austurlands á Reyðarfirði sem starfrækir sanddæluskip og verður skrifað undir verksamninginn í þessari viku. Dæling hefst væntanlega í þessum mánuði segir Helgi Már Pálsson verkfræðingur og munu þessar framkvæmdir standa yfir út september. Ætlunin er að grafa niður á níu metra dýpi í innsiglingarleiðina um grynnslin utan við ósinn og verður rennan 70 metra breið. Hryggurinn sem þarna hefur myndast og þarf að fjarlægja úr siglingarleiðinni liggur um 300 metra út og austan Hvanneyjar til suðausturs. Efnið sem upp kemur verður losað utan við innsiglinguna þar sem straumar bera það burt. Lesa meira

Starfsemi Tónskólans á Hornafirði er að hefjast og verða nýir nemendur innritaðir í skólann nk. föstudag, laugardag og mánudag. Í tónskólanum verða u.þ.b. 110 nemendur í einkatímum og 70 nemendur í forskóla. Við tónskólann starfa 10 kennarar og eru það allt sömu kennararnir og í fyrra. Kennt verður í Sindrabæ, Nesjaskóla, Hrollaugsstöðum og Hofgarði. Reiknað er með að hægt verði að bæta inn um 20 nýnemum á þetta skólaár. Skólinn kennir á tré- og málmblásturshljóðfæri, píanó og hljómborð, harmónikku, klassískan og raf gítar, raf bassa og trommur. Einnig eru kenndar bóklegar greinar eins og tónfræði og tónheyrn. 25 manna lúðrasveit er starfrækt við skólann og stefnir hún að því að fara á lúðrasveitamót skólalúðrasveita sem haldinn verður í Grafarvogi 5.-7. nóvember n.k. Einnig æfa nemendur í fjölbreyttum samspilshópum eins og pop og jass-hljómsveitum og 3ja upp í 5 manna hópa. Tónskóli A-Skaft. hefur staðið að 15 tónleikum á ári auk þess sem nemendur hafa komið víðsvegar fram í bænum. Stefnt er að því að kennsla hefjist miðvikud. 25. ágúst. Lesa meira

Það sem fáir áttu von á að væri mögulegt hefur tekist. Sigrún Ósk Kristjánsdóttir, Íslandsmeistari í sparakstri og sjónvarpskona, ók hringveginn á Toyota Prius án þess að taka bensín á leiðinni. Tankurinn var fylltur við upphaf ferðar í Reykjavík á miðvikudag og síðan var hringvegurinn ekinn á tveimur dögum. Meðaleyðslan í ferðinni var lengst af 3,7 – 3,9 l á 100 km. Á lokasprettinum þegar ljóst var að hringnum yrði lokað á einum tanki var hraðinn aukinn upp í leyfilegan hámarkahraða á þjóðvegum og niðurstaðan varð því sú að meðaleyðsla í ferðinni var 4 lítrar á 100 km. Lesa meira

Í hitabylgjunni sem gengur yfir landið þessa daga er fátt sem minnir á að haustið sé í aðsigi og skólarnir að fara að hefjast. Í skólunum eru hjólin þó farin að snúast, stjórnendur vel á veg komnir með skipulagningu og kennarar farnir að undirbúa sig. Í dag hefst námskeið á vegum skólskrifstofunnar sem heitir Umsjónarkennarinn en það er eins og nafnið bendir til fyrst og fremst ætlað umsjónarkennurum. Skólasetning verður síðan mánudaginn 23. ágúst. Skólastarf verður með hefðbundnu sniði en þó breytast tímasetningar á stundaskrám lítilega, þannig að allir dagar vikunnar verða jafnlangir. Í Hafnarskóla verður unnið að ákveðnu þróunarverkefni sem nefnist Aðstoðarkennarinn. Þetta verkefni felst í því að við skólann munu starfa tveir kennarar sem fyrst og fremst sjá um stuðning inn í bekkjum og við litla hópa. Lesa meira

Enn bætist við einn hitadagurinn til viðbótar og er misjafnt hvað mönnum finnst, sumir kvarta yfir því að þetta sé einum of mikið og svo eru það hinir sem dásama veðrið og fullyrða að þessu sé auðveldlega hægt að venjast og vona að þetta haldist sem lengst. Þessa dagana selja verslanir og söluskálar mikið af svaladrykkjum og ís sem er nauðsynlegt til að kæla sig niður. Hvert sem litið er þá virðast allir njóta blíðunnar, iðnaðarmenn sem koma því við taka útiverkin og láta inni vinnuna bíða þar til veður verður ekki eins gott. Lesa meira

Í síðustu viku lauk Handverkssýningunni á Hrafnagili í Eyjafirði. Sextíu aðilar sem komu víða af landinu tóku þátt í sýningunni og voru það bæði einstaklingar og fyrirtæki og þar á meðal eitt fyrirtæki frá Hornafirði sem var Rennismíði Ragnars. Það er Ragnars Arason, oft kenndur við Borg á Mýrum sem bak við það fyrirtæki. Ragnar sýndi þar fjölbreytt úrval af allskonar munum renndum úr tré. Ekki var auðvelt að ná sambandi við Ragnar þegar fréttamaður vefsins kom á sýninguna því mikið var að gera hjá honum, en konan hans, Helga Magnúsdóttir, sagði að það væri búið að vera alveg óskaplega gaman að taka þátt í þessari sýningu. Margir Hornfirðingar lögðu leið sína í Hrafnagil og skoðuðu sýninguna og sumir héldu svo til Dalvíkur til að taka þátt í Fiskiveislunni miklu. Lesa meira

Aldrei hefur verið eins mikið um að fólk ferðist um landið á húsbílum, bifreiðum með hjólhýsi eða fellihýsi eins og í sumar. Þetta hefur haft í för með sér að mikill metnaður er lagður í að veita þessum ferðalöngum sem besta þjónustu hér á Höfn og er því aðstaðan á tjaldstæðinu fyrir húsbíla, felli- og hjólhýsi fyrsta flokks og með þeim betri á landinu. Ekki eru það allir sem kjósa að nýta sér þessa aðstöðu og hefur það verið áberandi í sumar að ferðafólk hefur lagt farartækjum sínum næturlangt og stundum lengur víða í bænum þrátt fyrir að til staðar sé rúmgott og snyrtilegt tjaldstæði á fallegum stað með allri tilheyrandi þjónustu. Lesa meira

Það tók 4. flokk kvenna hjá Sindra nákvæmlega þrjá tíma að hlaupa frá Höfn og upp að Jökulsárbrú í Lóni. Lagt var af stað frá Ráðhúsi s.l. mánudag kl.13:00 og hljóp hver hlaupari 2 km í einu en það voru alls 14 stelpur sem tóku þátt í maraþonhlaupinu. Á undan hlauparanum var Björgunarsveitarbíll og á eftir kom lögreglan og var þetta gert til að tryggja öryggi hlauparana. Síðustu þrjá kílómetrana hlupu stelpurnar allar ásamt þjálfara sínum og voru þær komnar á Jökulsá í Lóni á slaginu kl.16 og þá búnar að vera þrjár klukkustundir á leiðinni. Í dag ætla stelpurnar að ganga í fyrirtæki með þjálfara sínum og verður erindið beiðni um að viðkomandi fyrirtæki styrki þær í för sinni á Íslandsmeistaramótið sem verður haldið helgina 20.-22. ágúst á Akureyri. Lesa meira

Vöxtur á grænmeti og garðávöxtum í skólagörðunum er hreint frábær, miklu meiri en var í fyrra sumar segir Sigurborg Jóna Björnsdóttir umsjónarmaður skólagarðanna á Höfn. Um tuttugu krakkar eru með reiti í skólagörðunum í sumar þar sem þau rækta kartöflur, grænkál, blómkál, brokkolí, gulrófur o.fl. Krakkarnir eru eitthvað farin að taka upp og fara hreykin heim með sýnishorn af uppskerunni. Það eru krakkar úr öðrum til sjöunda bekk sem eru með garða og eru stelpurnar þar í meirihluta. Sigurborg segir dálítið misjafnt hvað krakkarnir hugsi vel um garðana sína og þeir sem hafa verið duglegir að vökva, reita arfa og hugsa vel um garðinn þeir fái meiri uppskeru. Lesa meira

Gott sumar og gott útlit með haustið segir ferðaþjónustubóndinn Þorsteinn Sigfússon á Skálafelli í Suðursveit. Hann segir að sl. júnímánuður hafi verið mikið betri en í fyrra, í júlí hefur allt verið fullbókað eins og var síðasta sumar og fullbókað er fram yfir 20.ágúst. Við höfum hér gistipláss í uppbúnum rúmum fyrir tuttugu og fimm manns og rekum við okkar þjónustu í samvinnu við Ferðaþjónustu bænda. Um 90% þeirra gesta sem koma hingað eru útlendingar. Húsbílaklúbburinn sem kom með Norrönu síðast, alls 105 bílar voru á Skálafelli um helgina. Þeir voru hér austan við Kolgrímu við Langahraun og voru mjög ánægðir með staðinn, nóg pláss og þægilegt að vera á sandinum sagði Þorsteinn. Það eru samtök húsbílaklúbba á Norðurlöndum sem að þessari ferð standa ásamt nokkrum þátttakendum frá Hollandi, Belgíu og Þýskalandi og er ferðin skipulögð af íslendingum sem eru meðlimir í þessum samtökum. Byrjað var að skipuleggja ferðina í fyrrahaust og einnig mun Smyril Line standa að þessu. Nokkrir úr hópnum ( 6-7) fóru norðurleiðina frá Seyðisfirði, þeir höfðu frétt að þeir gætu áð hvar sem væri á Íslandi og, samkvæmt grein í dönsku blaði, lagt sínum húsbílum hvar sem þeim dytti í hug. Lesa meira

Þetta er búið að vera ágætis sumar og aðsókn í sundlaugina góð segir Guðlaug Pétursdóttir sundlaugarvörður á Höfn. Í júlí voru sundlaugargestir 6415 en í júlí í fyrra 6501. Frá 1. febrúar til júlíloka í sumar höfðu 19.267 manns komið í sundlaugina en 17.752 á sama tíma í fyrra. Guðlaug segir að yfir sumarið séu þetta langmest útlendingar sem komi í sund og svo föstu viðskiptavinirnir hér á staðnum. Þetta eru 8-14 eldri borgarar, konur og karlar, sem alltaf eru mætt kl 6.50 á morgnana og þau eru ekki að spá í veðrið mæta bara á hverju sem gengur. Sundlaugin opnar kl. 7.00 og er opin til kl.20.30. Frá kl. 9 -12 hafa verið sundæfingar og kennsla 5 ára barna, eins hafa þau sem luku 6 ára bekk í vor sótt æfingar ásamt krökkum allt upp í 14 ára. Lesa meira

Hitamet sumarsins í Skaftafelli var í morgun 26°C, á löggildum hitamæli eins og Ragnar Frank Þjóðgarðsvörður orðaði það og 23°C í Hæðum kl 8.00 í morgun. Á Höfn var hitinn kl 8.30 í morgun 17° í forsælu. Hitamóða liggur yfir fjöllum og jöklum svo skyggni er ekki sérlega gott, er bara eins og í útlöndum. Þetta er heitasti morgun sumarsins í Skaftafelli og það er alveg hrikalega heitt sagði Ragnar, það er að mestu sólarlaust og 5 – 6 metrar austan vindur. Það eru nær eingöngu útlendingar sem núna njóta veðurblíðunnar á tjaldstæðinu í Skaftafelli. Lesa meira

Meistaraflokkur kvenna, Sindraskvísurnar kepptu við Hött frá Egilsstöðum á Sindravelli í dag og að sjálfsögðu sigruðu þær Hött með yfirburðum eins og þeim einum er lagið, voru stöðugt í sókn og lögðu Hött af velli með 6-0. Markaskorarar voru Jóna Benný 3 mörk, Guðrún Ása 2 mörk og Lena 1 mark. Þess má geta að Sindraskvísurnar eiga þrjú efstu sætin yfir markaskorara í deildinni, Jóna Benný er þar á toppnum með 12 mörk í 7 leikjum, Soffía 6 mörk og Valdís ósk með 5. Þetta var síðasti leikurinn í riðlakeppninni hjá þeim og þá er bara úrslitakeppnin eftir. Fyrsti leikurinn verður 17. ágúst n.k. og munu þær keppa við Keflavík, einn heimaleik og annan úti. Það er ljóst að það mun verða mjög hörð keppni, því líkt og Sindraskvísurnar þá hafa Keflvíkingarnir unnið alla sína leiki með yfirburðarmarkastöðu. Lesa meira

Næstkomandi mánudag ætlar 4. flokkur kvenna ásamt þjálfara sínum Mica að hlaupa frá Höfn og að Jökulsárbrú í Lóni. Lagt verður af stað frá Ráðhúsinu kl.13:00. Leiðin er 36 km löng og er áætlað að það hlaupið taki þrjá klukkutíma. Hlaup þetta er til að safna fjármagni með áheitum og styrkja með því ferð 4. flokks kvenna á úrslitakeppni sem fer fram á Akureyri helgina 20. og 21. ágúst n.k. Eins og áður hefur komir fram þá er 4.flokkur kvenna orðnar Austurlandsmeistarar og því er bara eftir að keppa um Íslandsmeistaratitilinn. Það er ósk þjálfara og aðsendanda stúlknanna að fyrirtæki sem verða beðin um að styrkja stúlkurnar taki vel á móti þeim. Undanfarið hafa þær verið á ströngum æfingum sem meðal annars hefur verið mikið hlaup til að undirbúa þær fyrir hlaupið upp í Lón. Lesa meira

Sjónvarpskokkurinn Jamie Oliver sem betur er þekktur sem Kokkur án klæða kom til Hafnar í gær ásamt 8 manna föruneyti á vegum Ástralska tímaritsins Delicious. þar var hann myndaður með hreindýrum en þær myndir á að nota í jólablaði Delicius. Einnig var komið við á Jökulsárlóni og hélt hópurinn héðan í gær til. Að sögn Helgu Margrétar Reykdal hjá fyrirtækinu Truenorth sem sér um framkvæmdina hér á landi var Jamie mjög ánægður með ferðina hingað austur og sér í lagi hvað allt gekk upp tímanlega. Þetta er í fyrsta skipti sem hann kemur til Íslands. Lesa meira

Fyrsta skemmtiferðarskipið sem hingað kemur í sumar kom í morgun um fimm leitið. Skipið sem heitir Clipper Adventurer er frá Bahamaeyjum, það er um 100 metra langt og 16 metra breytt og flokkast undir lítið skemmtiferðaskip. Skip sem þetta eiga auðvelt með að komast inn til Hornafjarðarhafnar vegna hversu grunnt þau rista. Skipið er með um 70 áhafnarmeðlimi og tekur 122 farþega. Í þessari ferð eru farþegarnir 60 og er viðkoma þeirra hér hluti af 13 daga ferð sem hófst í Bandaríkjunum, þaðan til Írlands, Skotlands, Færeyjar og síðan Hornafjarðarhöfn. Ferð sem þessi kostar frá bilinu 300 til 500 þúsund krónur sem fer eftir því hvaða munaður er valinn um borð. Lesa meira

Kennarar eru byrjaðir að huga að sínum vetrarstörfum og undirbúningi fyrir skólastarfið. Um 140 nemendur verða í Heppuskóla á Höfn í vetur og er það nokkrum fleiri en þar voru í fyrra. Guðmundur Ingi Sigbjörnsson skólastjóri Heppuskóla segir að fullmannað sé í kennarastöður við skólann. Þetta er nánast allt heimafólk, fólk með réttindi og hefur kennt við skólann. Í fyrra voru nokkrir kennarar okkar, konur, í barnseignarfríi (þetta gekk eins og faraldur), en þær eru nú að koma aftur til starfa. Helstu breytingar í Heppuskóla eru að nú flytjum við í nýtt og glæsilegt húsnæði með verk-og listgreinar okkar. Þetta nýja húsnæði er um 300 fermetra pláss í vöruhúsi Kask sem nú er fullfrágengið sem kennslustofur, mjög skemmtileg og góð aðstaða. Lesa meira

Bæjarráð Hornafjarðar hefur samþykkt fram lögð drög að erindisbréfi undirbúningsnefndar um náttúrustofu á Suðausturlandi. Umhverfisráðherra lét þau orð falla fyrir nokkru síðan að næsta svæði þar sem náttúrustofa yrði opnuð væri suðausturland og er það ástæða þess að þessi undirbúningshópur hefur verið settur á laggirnar. Hlutverk hópsins er m.a. að skoða hvort tengja megi starfsemi náttúrustofu starfsemi annarra stofnana á svæðinu s.s. Háskólasetrinu og Jöklasýningu. Nú eru 6 náttúrustofur starfræktar á landinu og eru þær: Náttúrustofa Suðurlands, Náttúrustofa Austurlands, Náttúrustofa Vestfjarða, Náttúrustofa Vesturlands, Náttúrustofa Norðurlands vestra og Náttúrustofa Reykjaness. Ráðherra er heimilt að leyfa starfrækslu allt að átta náttúrustofa er starfa á vegum sveitarfélaga óháð kjördæmaskipan og skal um hverja stofu gera samning milli ráðherra og þeirra sveitarfélaga sem standa að náttúrustofu. Lesa meira

Verktakinn við jarðgangagerðina í Almannaskarði, Leonhard Nilsen og Sönner frá Noregi og Hérðasverk ehf, komu galvaskir aftur til starfa miðvikudaginn 28. júlí eftir tveggja vikna sumarhlé. Þá voru göngin 299 m að lengd að sunnanverðu. Nú í dag, miðvikudaginn 4. ágúst, eru göngin hins vegar orðin 405 m að lengd og hafa því lengst um 106 m á einni viku. Hér er um glæsilegt Íslandsmet að ræða í tvíbreiðum veggöngum. Sprengt var 21 sinni í vikunni og lengdust göngin því um 5 m í hverri sprengingu að jafnaði. Þrátt fyrir þessi miklu afköst í metrum talið þá var bergið ekkert sérstaklega gott og þurfti að sprauta steypu á nánast hverja sprengifæru (5-7 m3 í hvert sinn). Auk þess voru settir upp 8-12 bergboltar í hverja sprengifæru til að styrkja bergið. Lesa meira

Hornfirðingar hafa verið dugleigir að nota veðurblíðuna í sumar til byggingaframkvæmda, byggt sólpalla, garðhús, málað hús sín og sitthvað fleira. Í járnvörudeild Kask fengust þær upplýsingar að mest hefði aukist sala á pallaefni og væri sala á því miklu meiri en síðasta sumar, um helmingi meira hefur verið selt af málningu og eins hefur mikið aukist sala á byggingarefni. Miklar framkvæmdir hafa verið og eru framundan við byggingu sumarbústaða víða í sveitarfélaginu, stækkun á þeim eða aðrar breytingar. Lesa meira

Það gengur vel núna þegar veiðifært er, í dag er vatnið í Laxá í Nesjum búið að vera kolmórautt eftir þessa miklu rigningu segir Guðjón Pétur Jónsson framkvæmdastjóri. Vegna þurrkanna í sumar var áin svo vatnslítil að laxinn komst ekkert upp ána og beið bara í bunkum, því vorum við afskaplega hamingjusamir yfir rigningunni þegar hún loksins kom og dönsuðum stríðsdans, vorum orðnir þreyttir á regndansinum sem skilaði svo litlu. Guðjón segir að vel hafi gengið að selja laxveiðileyfin og nánast öll séu þau uppseld og flest til útlendinga. Um helgina veiddust 18 laxar og er stærðin frá 5 til 12 pund. Flestir útlendingarnir sleppa laxinum aftur, þetta er bara til að fá útrás fyrir veiðieðlið en ekki til að drepa. Veiðitímabilið í Laxá er frá 10. júlí til 1.október, veiðidagar eru um 80 og stangardagar 160, eins og það heitir á laxveiðimáli. Veiðileyfi yfir besta veiðitímann, sem er í ágúst, kosta 19 þúsund kr. fyrir stöngina og er þá innifalin gisting og veiði í 12 tíma. Laxveiðifélagið leigir hús í Nesjahverfi til afnota fyrir laxveiðimennina. Lesa meira

Miklar rigningar hafa verið á Suðausturlandi síðasta sólarhringinn og vatnsföll orðin sjó-mikil. Jón Bjarnason hjá Vegagerðinni segir að ekki hafi neinar stórskemmdir orðið á vegum en víða hafi runnið úr vegköntum og full ástæða sé fyrir ökumenn að gæta varúðar. Aurskriða féll í Þvottárskriður um kl. 4 síðustu nótt og önnur um kl 8 í morgun. Búið var að hreinsa af veginum um kl 9.30 en Jón segir að haldi áfram að rigna séu líkur á að fleiri aurskriður geti komið. Skriðurnar sem koma í Þvottárskriðum koma úr þröngu gili þannig að ekki riðst mikið magn af aur og möl í einu á veginn og því er auðvelt fyrir vegfarendur að varast þær a.m.k. meðan dagsbirta er. Í gær var úrkoman í Akurnesi 65 millimetrar frá kl.18 í gær til 9 í morgun sem var toppurinn á landinu en meðal rigning er 15–25 millimetrar . Lesa meira

Menningarmiðstöð Hornafjarðar hefur í sumar verið með einhverjar uppá komur í hverri viku fyrir krakkana. Í síðustu viku var sögurölt um Höfn í fylgd Gísla Sverris Árnasonar og farið um elsta hluta bæjarins. Byrjað var út á Leiðarhöfða, gengum svo eftir Höfðavegi og Hafnarbraut, þaðan fórum við niður að Höfn og skoðuðum minnismerki og listaverk sem þar eru sagði Gísli Sverrir. Við fórum að elstu húsunum, Guðmundar-húsinu og Kaupmanns-húsinu en þau voru fyrstu húsin sem byggð voru á Höfn ásamt Gömlubúð árið 1897 og nálguðumst við þannig alveg upphafsárið hér á Höfn. Svo speguleruðum við svolítið með viðmiðun við höfnina þar sem má rekja upphaf byggðarinnar, eins skoðuðum við Miklagarð og verbúðina sem þar er, pakkhúsið og þá sögulegu muni sem þar eru. Lesa meira

Árið 1954 var ákveðið að minnast þess að 30 ár væru liðin frá að Erik Nelson flaug fyrstur manna til Íslands og var ákveðið að Flugmálafélag Íslands beitti sér fyrir því að reistur væri minnisvarði á Hornafirði til minningar um þessi merku tímamót í flugsögu Íslands. Jafnframt var unnið að því Nelson gæti verið viðstaddur er minnismerkið yrði afhjúpað. Allt gekk þetta eftir og Flugfélag Íslands flutti steindranginn austur og var honum valinn staður við flugbrautina á Melatanga. Mánudaginn 2.ágúst lenti Snæfaxi flugvél Flugfélags Íslands með marga framámenn flugmála, Þórhall Daníelsson fyrrum kaupmann á Höfn, sem tók á móti Nelson á Höfn fyrir 30 árum, og þar kom einnig flugkappinn og heiðursgesturinn Nelson. Athöfnin á flugvellinum var látlaus og byrjaði með ávarpi forseta Flugmálafélags Íslands, Jóns Eyþórssonar og í lokin sneri Jón máli sínu til fulltrúa Hafnarkauptúns og þakkaði Hornfirðingum fyrir virðulegar móttökur og þá ágætu aðstoð sem þeir hefðu veitt og sagði “ Hafnarbúum og héraðsmönnum öllum fel ég þennan minnisvarða til varðveislu í framtíðinni”. Að loknum ávörpum var Nelson beðinn að afhjúpa minnisvarðann sem á var letrað: Erik Nelson flaug fyrstur til Íslands 2.ágúst 1924. Lesa meira

Flugeldasýningin á Jökulsárlóni fór fram í gærkvöldi að viðstöddu um 800 manns sem kom víða að. Veður var upp á sitt besta og var Jökulsárlónið upptendrað af stórum kertum sem búið var að dreifa vítt og breitt um lónið sem gaf umhverfinu ævintýrablæ. Á lóninu mátti heyra Zodiac bátana þeytast um er verið var að leggja síðustu hönd á sýninguna. Það var mikil eftirvænting í loftinu og víða máttu heyra lýsingar þeirra sem höfðu séð sýninguna á síðasta ári. Rétt um hálftíma eftir miðnætti þegar myrkrið hafði skollið á varð allt í einu mikil kyrrð sem síðan var röfin með miklum hvellum og það birti yfir lóninu, sýningin var hafin. Í hálftíma mátti líta augum ljósadýrð sem myndaðist við samspil jökla og flugeldanna sem sprungu víða um lónið hver öðrum öflugri. Lesa meira