Apríl

Forsetaheimsókn 26.apríl 2006

Þetta var alveg ótrúlegt, aldeilis meiri háttar ferð

Í gær héldu forsetahjónin Ólafur Ragnar Grímsson og Dorrit Moussaieff ásamt sýslumannshjónunum Páli og Ólafíu, Albert bæjarstjóra, bæjarstjórnarmönnum og öðru fylgdarliði, í Suðursveit þar sem komið var við í Hrollaugsstaðarskóla, í Þórbergssetri á Hala og að Jökulsárlóni. Við lónið var Einar Björn staðarhaldari að gera klárt fyrir siglingu en talsvert ísrek var við landið. Vel tókst þó að koma farþegunum um borð og gúmbátnum á flot og fikra sig út á lónið þar sem fjöldi sela var á sveimi. Haldið var á James Bond slóðir þ.e þar sem kvikmyndað var forðum. Þetta var alveg ótrúlegt, aldeilis meiri háttar ferð sagði Ólafur Ragnar þegar hann steig á land og greinilegt var að ekki var Dorrit minna ánægð með siglinguna. Lesa meira
Hrollaugsstaðrskóli

Árshátíð Hrollaugsstaðaskóla

Árshátíð Hrollaugsstaðaskóla verður haldin á Hrollaugsstöðum föstudaginn 28.apríl og hefst klukkan 20:00. Þetta er síðasta árshátíð skólans þar sem ákveðið hefur verið að ekki verði kennsla í Hrollaugsstaðaskóla næsta vetur. Nemendur eru með fjölmörg skemmtiatriði, selja skólablað og síðan eru kaffiveitingar. Allir eru velkomnir að koma og skemmta sér með nemendum og starfsfólki Hrollaugsstaðaskóla. Lesa meira
Forsetaheimsókn 26.apríl 2006

Fjölmenn fjölskylduhátíð í íþróttahúsi

Talið er að nær 600 manns hafi komið saman á fjölskylduhátíðinni sem haldin var til heiðurs forseta Íslands og forsetafrú í íþróttahúsinu á Höfn í gærkveldi. Fjölmargir hornfirskir listamenn komu þar fram og vöktu mikla hrifningu gesta. Forseti Íslands ávarpaði hátíðargesti og þakkaði fyrir góðar móttökur sem þau hjónin hefðu verið aðnjótandi í þessari annarri opinberri heimsókn sinni í Austur-Skaftafellssýslu. Forsetinn kom víða við í ávarpi sínu; ræddi um ægifagra náttúru sýslunnar, góða aðstöðu til að rækta menntun og menningu. Hér væri líka að finna öflug og framsækin fyrirtæki og stofnanir. Hann hvatti til að hlúð yrði vel að uppbyggingu Þórbergsseturs á Hala í Suðursveit til að varðveita minningu Þórbergs Þórðarsonar skálds og nefndi í því samhengi Hús skáldsins að Halldórs Kiljan Laxness Gljúfrasteini og Gunnarsstofu á Skriðuklaustri þar sem varðveitt er minning Gunnars Gunnarssonar skálds. |nl|Forsetinn lagði áherslu á þann mikla auð sem fólk hefði úr að vinna í Austur-Skaftafellssýslu og sagðist öfunda unga fólkið í dag af að takast á við fjölbreytt tækifæri á svo mörgum sviðum. Lesa meira
Frá æfingu Tónskóla Austur-Skaftafellssýslu

Tónskólinn með tónleika í Nýheimum

Föstudaginn 28. apríl verða tónleikar í Nýheimum á vegum Tónskóla Austur-Skaftafellssýslu þar sem lengra komnir nemendur skólans ætla að spila metnaðarfulla dagskrá. Þetta eru seinni tónleikarnir af tveimur en þeir fyrri voru haldnir 2. apríl s.l. Á tónleikunum verður m.a. píanóleikarar, þverflautuleikur, bassaleikur og saxófónleikur. Að lokum spilar léttsveit úr skólanum undir stjórn Gunnlaugs Þrastar ýmsar tónlistarstefnur svo sem swing, jass og dixilandtónlist. Að sögn Jóhanns Morávek skólastjóra tónskólans þá eru um 180 nemendur sem stunda nám við skólann þetta árið og við skólann starfa 10 kennarar. Kennsla hefur farið fram í Sindrabæ, Nesjaskóla, Hrollaugsstöðum og Hofgarði. Tónskóli A-Skaft. hefur staðið að 15 tónleikum á ári auk þess sem nemendur hafa komið víðsvegar fram í bænum. Lesa meira

 




Fréttir


Tungumál



Útlit síðu:

Brúin yfir Kotá hækkuð Lögreglan á Höfn við eftirlitsstörf Heimir Þór þurrkar fjallagrös Frá brunanum í Akurey (úr myndasafni)