Það styttist í árshátið humarsins sem haldin er hátíðleg á hverju ári á Hornafirði og má segja að Mastrið sé komið í humarklæðin í þessum þætti, en þátturinn er að mestu helgaður komandi Humarhátið. Ásamt því að ræða við aðstandendur hátíðarinnar og öðrum sem henni tengjast, hittum við Stjána Hauks sem mun yfirgefa humarinn fyrir hestinn, en hann ætlar að fara á Landsmót hestamanna ásamt fögru föruneyti yfir helgina. Stórhljómsveitin og Hornfirðingar síðasta árs, Modis taka lagið í þættinum, alltaf gaman að sjá og hlusta á gott músík-atriði. Framhaldsheimildarmyndin eftir þá félaga Ása og ÓlaAlbert um Stórfót verður frumsýnd í þættinum, og verður gaman að sjá hverju drengirnir taka uppá í þetta skiptið. Lesa meira

Föstudaginn 30. júní 2006, verður Þórbergssetur á Hala í Suðursveit opnað við hátíðlega athöfn. Fjölmörgum er boðið að taka þátt í opnunardagskránni, þar á meðal ráðherrum, þingmönnum kjördæmisins, samstarfsaðilum og fjölmörgum velunnurum verkefnisins. Meðal annars mætir hópur nemenda Háskóla Íslands sem sat málstofu um Þórberg síðastliðinn vetur ásamt Bergljótu S. Kristjánsdóttur lektor við Háskóla Íslands sem stjórnaði málstofunni . Einnig er fjölmörgum Skaftfellingum boðið til dagskrár þar á meðal öllum ferðaþjónustuaðilum á svæðinu. Dagskráin verður með hefðbundnu sniði, ávörp gesta og heimamanna, karlakórinn Jökull syngur lög við ljóð Þórbergs, Jón Hjartarson og Ragnheiður Steindórsdóttir leikarar lesa úr verkum skáldsins og síðan verða opnaðar tvær sýningar í sýningarsölum setursins. Óhætt er að fullyrða að ýmislegt óvænt mun mæta gestum við opnun sýningar í vestri sal en það hefur verið haldið mikilli leynd yfir þeirri sýningu allt til opnunardags. Lesa meira

Ráðherrafundur EFTA hófst á Höfn í gær kl 9 og lauk um kl. 18. Að fundi loknum var snæddur hátíðarkvöldverður í Skinney Þinganesi og að honum loknum var móttaka fyrir gestina á Jöklasýningunni. Í morgun héldu flestir fundarmenn upp á Skálafellsjökul þar sem farið verður á snjósleða og snjóbílum á jökulinn. Um 150 manns tóku þátt í fundinum og voru fundarstaðir í Nýheimum og á Hótel Höfn. Eitt af þeim málefnum sem afgreidd voru á fundinum var samþykkt á fríverslunarsamningi við samband Afríkuríkja og er það 16. fríverslunarsamningurinn sem gerður er. Lesa meira

Fyrsta alheimsráðstefna psoriasis- og psoriasisgigtarsjúklinga, fór fram í Stokkhólmi dagana 31. maí til 4. júní síðastliðinn. Meðal þeirra sem þessa ráðstefnu sátu var Stella Sigfúsdóttir sem starfað hefur við NEST verkefnið hér á Hornafirði. Á ráðstefnunni í Stokkhólmi var Stella verkefnisstjóri og fréttaritari SPOEX, Samtaka psoriasis- og exemsjúklinga á Íslandi, en hún hefur unnuð mikið hjá samtökunum og var ein af stofnendum þeirra. Ég er sjálf psoriasissjúklingur frá 8 ára aldri og er ein af stofnendum SPOEX árið 1972, þá aðeins unglingur að aldri, segir Stella. Gegnum tíðina hef ég unnið fjölmörg störf fyrir samtökin, bæði í sjálfboðavinnu, í launuðu starfi, í sértækum verkefnum og átt sæti í stjórn og nefndum samtakanna allt aftur til ársins 1985.. Með ráðstefnunni var brotið blað í sögu þessara sjúklingahópa og á ráðstefnunni kynntu læknar og vísindamenn nýjustu lyf og meðferðir við þessum sjúkdómum. Lesa meira

Sunnudaginn 25. júní hefst ráðherrafundur Fríverslunarsamtaka Evrópu (EFTA) í Nýheimum á Höfn. Fundinn sækja utanríkis-og viðskiptaráðherrar EFTA-landanna fjögurra, Íslands Liechtenstein, Noregs og Sviss, framkvæmdastjórn EFTA, dómarar hjá EFTA dómstólnum og fulltrúar frá Eftirlitsstofnun EFTA. Þá sækja þingmannanefnd og ráðgjafanefnd EFTA fundinn, ásamt fulltrúum frá Evrópusambandinu, sem munu funda með ráðgjafanefndinni. Ísland fer nú með formennsku í EFTA samstarfinu og er fundurinn haldinn við lok íslensku formennskunnar. Valgerður Sverrisdóttir utanríkisráðherra leiðir fundinn á Höfn fyrir Íslands hönd, en ráðuneytið hefur undanfarið leitast við að halda fundi af þessu tagi á landsbyggðinni, til að gera samstarfsþjóðum Íslands kleift að kynnast aðstæðum í hinum dreifðu byggðu landsins. Síðasti ráðherrafundur EFTA sem Ísland hélt var árið 2002 og var hann haldinn á Egilsstöðum. Lesa meira

Svínabúskapur blómstrar vel núna, mikil eftirspurn er eftir svínakjöti og verð á því hefur hækkað. Svínarækt er á tveim bæjum í Hornafirði, á Miðskeri í Nesjum og á Nýpugörðum á Mýrum. Pálína Benediktsdóttir og Sævar Kristinn Jónsson á Miðskeri eru með ellefu gyltur og fá um 300 grísi á ár. Svínaslátrun fer fram í sláturhúsi Norðlenska á Höfn og er slátrað grísum frá okkur á 3-4 vikna fresti segir Pálína og við keyrum kjötinu sjálf til kaupandans sem er Kjötvinnslan á Reyðarfirði en þangað seljum við allt okkar kjöt. Það er óneytanlega mikill munur að vera í svona búskap þegar mikil eftirspurn er eftir afurðunum eða þegar við höfum þurft að standa í sölunni sjálf til neytenda. Pálína segir svínabúskapinn skemmtilega búgrein og að svín séu gáfuð og skemmtileg dýr. Lesa meira

Slökkvilið Hornafjarðar var kallað að Volaseli í Lóni rétt fyrir kl 19 í gærkvöldi. Við fengum tilkynningu um að kviknað væri í þvottahúsi á Volaseli sagði Steinþór Hafsteinsson slökkviliðsstjóri og þegar við vorum komnir hálfa leið komu boð um að búið væri að ráða við eldinn. Þegar við komum á staðinn var mikill reykur í þvottahúsinu en heimilisfólkinu hafði tekist að slökkva eldinn með handslökkvitæki og síðan var þvottahús og geymsla reykræst. Líklegt er að kviknað hafi út frá rafmagni og skemmdir eru ekki miklar. Engar skemmdir urðu í íbúðinni og lítill reykur barst þangað. Lesa meira

Horfur eru á góðri uppskeru hjá kartöflubændum í Hornafirði og ekki nema þrjár vikur í að hægt verði að kaupa nýjar kartöflur í matinn. Kartöflur frá Miðskeri eru væntanlegar a.m.k. á heimamarkaðinn eftir þrjár vikur og framleiðendur á Seljavöllum, Akurnesi og Grænahrauni eru á svipuðum tíma með sína uppskeru og reikna með að sala verði komin í fullan gang eftir mánuð. Allir þessir kartöfluræktendur settu mun meira útsæði niður í vor en verið hefur og eru bjartsýnir á kartöflusölu. Valdimar Ingólfsson á Grænahrauni sagði síðustu kartöflurnar af uppskerunni frá síðasta hausti fara í búðir á morgun og hjá hinum framleiðendunum er allt löngu búið. Lesa meira

17. júní er í hugum okkar flestra dagur gleði útiveru og útidansleikja, með blöðrum, fánum og öllu tilheyrandi. Þetta er jú líka þjóðhátíðardagurinn okkar. En okkur sem undanfarin ár, höfum haft veg og vanda af því að gera útivistarsvæðið í Haukafelli að því sem það er í dag, brá heldur en ekki í brún laugardagsmorguninn 17. júní. Vegurinn inn að Haukafelli var varðaður með bjórdósum og rusli og þegar komið var inn á sjálft skógræktarsvæðið var aðkoman þar ekki falleg. Búið var að brjóta rúður í þjónustuhúsinu, kveikt hafði verið bál á tjaldstæðinu og á það hafði verið hent alls konar viðleguútbúnaði. Tjaldstæðið sjálft var ekkert nema glerbrot og útspólað. Það er augljóst af öllum ummerkjum að þarna hafði ekki verið nein venjuleg útilega. Myndirnar tala sínu máli. Flest erum við alin upp við þá sjálfsögðu reglu að geri einhver eitthvað á annars hlut, eða valdi einhverjum tjóni, þá skuli sá hinn sami bæta fyrir það og biðjast afsökunar. Lesa meira

Á miðvikudagskvöld s.l. var hringt í Darra Snæ Nökkvason og honum boðið til Bessastaða á sunnudeginum til að taka á móti verðlaunum í Skákmyndkeppni Taflfélagsins Hróksins en Darri hafði sent mynd í keppnina eftir að nemendur í Hafnarskóla voru hvattir til að taka þátt í henni. Það sem skipti máli í keppninni var að myndin tengdist á einhvern hátt taflmennsku. Um 300 myndir bárust og voru veitt verðlaun fyrir frumlegustu, skemmtilegustu og krúttlegustu myndina en það var krúttlegasta myndin sem Darri teiknaði. Mynd Darra var af drottningu sem var að detta út af taflborðinu og hélt hún fast í kónginn. Verðlaunin voru afhent af Hr. Ólafi Ragnari Grímssyni forseta og Dorrit Moussaieff forsetafrú. Faðir Darra, Nökkvi Jóhannesson sagði Darra mjög hugmyndaríkan og að hann gæti teiknaði skemmtilegar myndir. Nökkvi sagði einnig að allar myndirnar sem sýndar sendar voru í keppnina og sýndar voru á Bessastöðum hefðu verið mjög flottar. Lesa meira

Laust fyrir hádegi í dag lagðist Milady að nýju bryggjunni við Austurfjörur til að lesta 3500 tonn af perlumöl sem fer til Ameríku. Milady er 5500 tonn og átti skipið ekki í neinum vandræðum með að leggjast að bryggjunni með góðri aðstoð hafnsögubátsins. Búið er að gera 20 m langa bryggju við Austurfjörur innanfjarðar skammt innan við ósinn og innsiglingin þar dýpkuð með uppdælingu á 30 þús.rúmmetrum efnis. Byrjað verður að lesta skipið í dag og taldi Ómar að það gæti tekið um einn sólarhring. Ómar Antonsson á Horni hefur veg og vanda af sölu á perlumöl af Austurfjörum sem fer bæði á Reyðarfjörð og til Ameríku. Búið er sigta um 10 þúsund tonn af möl sem tilbúin er til afhendingar Lesa meira

Útliti Gömlubúðar, sem hýsir byggðarsafn Austur-Skaftfellinga, hefur hrakað mikið undanfarnar vikur og húsið orðið frekar illa útlítandi. Björn Arnarson safnvörður segir að byrjað sé á lagfæringum á húsinu og að Málningarþjónusta Hornafjarðar muni sjá um að mála húsið að utan og ef ekki rigni mikið næstu daga ætti verkinu að vera lokið fyrir humarhátíð. Björn segir aðsókn að safninu vera góða, svipaða og var í fyrra sem var mjög gott aðsóknarár. Lesa meira

Nú er innritun lokið fyrir sumarleyfi hjá Framhaldsskólanum í Austur-Skaftafellssýslu. Skrifstofa skólans verður lokuð frá 16. júní til 8. ágúst. Áfram er þó hægt að sækja um skólavist á vef skólans undir liðnum "Umsókn um skólavist", þar til skóli hefst 22. ágúst. Ekki verður þó tekið tillit til umsókna sem berast eftir 15. ágúst við gerð stundatöflu. Frestur til að sækja um fjarnám er til 30. ágúst. Alls eru nú skráðir um 110 nemendur á haustönn. Umsóknir um vélstjórnarnám voru 17, umsóknir nemenda úr 10. bekk voru 32 og aðrar umsóknir voru á annan tuginn. Lesa meira

Fremur fáliðað er í unglingavinnunni hjá Hornafjarðarbæ það sem af er sumri aðeins 43 skólanemar. Ástæðan fyrir þessu er gott atvinnuframboð í bæjarfélaginu og krakkarnir eiga kost á að komast í aðra vinnu svo sem í fiskvinnslu, við afgreiðslustörf og á hótelum og gistiheimilum á svæðinu. Það er fámennt og góðmennt hjá okkur sagði Bjarni Ólafur Stefánsson sem hefur yfirumsjón með unglingavinnunni, við erum með einn verkstjóra og fimm flokksforingja og þessum 43 er skipt í smáhópa. Þó þetta séu færri krakkar en oftast áður eru vinnuafköst mikil og það er alveg óhætt að segja að sex manna hópur skilar hlutfallslega mun meiri vinnu en 12 í hóp þar sem mikið betur er hægt að leiðbeina hverjum og einum unglingi þar sem færri eru saman. Við erum í þessum hefðbundnu störfum þ.e. að fegra og snyrta bæinn og í dag erum við að gera Hóteltúnið tilbúið fyrir 17.júní hátíðarhöldin. Lesa meira

Um kl. 2.30 í dag renndu reiðhjólakapparnir Bjarki Birgisson og Gyða Rós Bragadóttir í gegn um Almannaskarðsgöngin í fylgd lögreglunnar á Höfn. Bjarki og Gyða eru á hringferð um landið í þágu Velferðarsjóðs barna undir kjörorðinu ,, Hjólað fyrir velferð barna 2006´´ og komu þau frá Hvannabrekku í Berufirði í dag. Þau héldu ferð sinni áfram frá Akureyri sl. mánudag og hafa fengið allskonar veður og t.d. var snjór á Mývatns- og Möðrudalsöræfum en hjólin dugðu vel í snjónum og allt hefur gengið vel. Í fyrra sumar gekk Bjarki hringinn um landið undir kjörorðinu ,,haltur leiðir blindan´´ og vakti sú ferð verðskuldaða athygli og því ákvað hann að gera enn betur og hjóla hringinn í sumar í þágu barna með geðraskanir og fjölskyldna þeirra sem þurfa svo sannarlega á hjálp að halda. Í vetur var ákveðið að Gyða Rós tæki þátt í ferð Bjarka og hafa þau þjálfað sig vel og undirbúið ferðina í vetur. Lesa meira

Eins og allir vita þá er farið að styttast mjög í hina árvissu Humarhátíð okkar Hornfirðinga. Það er alltaf viss tilhlökkun sem fylgir því að fara á Humarhátíð. Þetta ár líkt og undanfarin ár er stefnt að því að hafa Humarhátíðina eins fjölskylduvæna og hægt er þannig að allir geti fundið eitthvað við sitt hæfi. Að þessu sinni fer hátíðin fram dagana 30. júní – 2. júlí. Hátíðarsvæðið okkar verður eins og undanfarin ár á bryggjunni. Þar verður skemmtidagskrá á föstudagskvöldinu, á laugardaginn og á laugardagskvöldinu. Stórdansleikur verður síðan að venju haldinn í íþróttahúsinu á laugardagskvöldið. |nl|Það er von okkar að Hornfirðingar fjölmenni á hátíðina sem endranær og hjálpi eins og alltaf mikið við undirbúninginn. Það er mikil vinna að standa að hátíð sem þessari og því þurfa margar hendur að koma að verkinu svo vel takist til. Lesa meira

Svo sem venja hefur verið undanfarin 5 ár stendur Menningarmiðstöð Hornafjarðar fyrir ýmsum námskeiðum og kynnisferðum fyrir börn á grunnskólaaldri. Í sumar verður þessi starfsemi í samvinnu við Sindra en Sigurður Örn Hannesson. Fyrsta skoðunar og kynnisferðin var í dag undir góðri leiðsögn starfsmanna Fuglaathugunarstöðvarinnar á Hornafirði þeirra Brynjúlfs Brynjólfssonar og Björns Arnarsonar. Mæting var við höfnina hjá Akurey og síðan var stefnan tekin á Óslandið þar sem fuglalíf er fjölbreytt með kríurnar í algjörum meirihluta og því betra að hafa góða húfu. Lesa meira

Slökkvilið Hornafjarðar var kallað að Hæðargarði 9 í Nesjum rétt fyrir kl.13 í dag og þegar slökkviliðið kom á staðinn var mikill eldur og reykur um allt húsið. Fjórir reykkafarar voru sendir inn með slöngur og gekk greiðlega að ráða við mesta eldinn en rjúfa þurfti þakið að hluta þar sem eldurinn hafði borist gegn um falskt loft hússins og í þakið. Steinþór Hafsteinsson slökkviliðsstjóri sagði að slökkvistarf hafi gengið vel en tjón er mikið og miklar skemmdir eru á húsinu og allt inni meira og minna skemmt af reyk. Lesa meira

Fuglar eru oft alveg ótrúlegir þegar þeir velja sér hreiðurstað og oft erfitt að átta sig á af hverju er valinn staður sem mönnum finnst stórhættulegur fyrir hreiður. Við þjóðveg eitt í Lóni á tjaldur hreiður á vegarbrúninni og ekki annað að sjá en hann sé ánægður með staðarval þó umferð sé mikil. Í hreiðrinu eru tvö egg og líklega stutt í að þar komi ungar en útungunartími er ca. 18-19 dagar samkvæmt upplýsingum frá Birni Arnarsyni fuglaáhugamanni. Tjaldurinn virðist sallarólegur í allri bílaumferðinni og liggur kyrr á hreiðri sínu og kannski er þetta hans aðferð til að tryggja hreiður sitt fyrir minki og tófu. Lesa meira

Á sjómannadag veitti Slysavarnafélagið Landsbjörg hina árlegu viðurkenningu til áhafna skipa sem sótt hafa námskeið hjá Slysavarnaskóla sjómanna og sýnt öðrum fremur góða öryggisvitund að mati kennara skólans. Viðurkenningin er farandbikar sem afhentur er til varðveislu um borð í viðkomandi skipi í eitt ár ásamt veggskildi til eignar. Áhöfnin á Þinganesi SF 25 frá Hornafirði hlaut viðurkenningu ársins 2006. Gunnar Þorgeirsson stjórnarmaður hjá Slysavarnafélaginu Landsbjörgu afhenti viðurkenninguna og veitti Jón Sigurðsson skipstjóri henni móttöku fyrir hönd áhafnar sinnar. Lesa meira

Í sumar komu sex erlendir sjálfboðaliðar til vinnu í þjóðgarðinum í Skaftafelli og verða í sex mánuði. Mennirnir vinna átta tíma á dag og er þetta mikill arður fyrir þjóðgarðinn að fá svona vinnukraft segir Ragnar Frank þjóðgarðsvörður. Það er allt á fullu hér hjá okkur og aldrei verið jafn vel undirbúið fyrir sumarið og núna sem þakka má auknum starfsmannafjölda sem hér er. Núna eru þrír fastráðnir starfsmenn í þjóðgarðinum í Skaftafelli og til viðbótar verða ráðnir um tíu íslenskir sumarstarfsmenn, einnig koma erlendir sjálfboðaliða eins og verið hefur , hópar sem eru smátíma hver. Lesa meira

Kvennahlaupið hefst í dag frá Sporthöllinni kl. 11. Sjóvá Kvennahlaup ÍSÍ mun fara fram á yfir 100 stöðum hérlendis og erlendis en árlega taka um 18.000 konur á öllum aldri þátt. Meginmarkmið Sjóvá Kvennahlaups ÍSÍ er að hvetja og styðja konur á öllum aldri til aukinnar hreyfingar og heilsueflingar. Konur eru hvattar til að vera á iði ekki aðeins þennan eina dag heldur sem flesta aðra daga ársins. Allar konur geta tekið þátt í Sjóvá Kvennahlaupi ÍSÍ á sínum forsendum, óháð aldri og líkamlegri getu. Í ár er yfirskrift Sjóvá Kvennahlaups ÍSÍ „Hvert skref skiptir máli. ÍSÍ og UNIFEM á Íslandi hafa skrifað undir samstarfssamning með það að markmiði að vekja athygli á starfi UNIFEM í þágu kvenna, sérstaklega í Afganistan, og hvetja íslenskar konur til að sýna samstöðu með mannréttindum kvenna um leið og þær efla eigin heilsu. 50 kr. af hverjum seldum bol mun renna til UNIFEM. Lesa meira

Tólfti árgangur Sjómannadagsblaðs Austurlands er kominn út og eru efnistökin fjölbreytt að vanda. Á meðal efnis er umfjöllun, í máli og myndum, um átök Breta og Íslendinga í þriðja þorskastríðinu sem lauk fyrir 30 árum, sagt frá mannskæðasta harmleik siglingasögunnar og viðtal við sjómanninn, sögumanninn og Norðfirðinginn Kristinn Pétursson sem lengi bjó á Hornafirði. Már Karlsson á Djúpavogi segir frá sjávarháska sem áhöfnin á Sunnutindi SU lenti í á síldveiðum árið 1961 og birt er brot úr óútgefnum æviminningum Vilhjálms heitins Árnasonar hæstaréttarlögmanns. Þá er einnig sagt frá síldveiðum á Íslandsmiðum á nítjándu öld og umfjöllun um ísbirni við Austfirði og margt fleira. Lesa meira

Á hverju sumri hefur Karl Sigurðsson ( Kalli á Móhól) flutt kindur sínar út í Mikley þar sem þær hafa unað vel við sitt í góðu graslendi til hausts og þegar flest var voru þar um 50 kindur. Nú er Kalli hættur sínum fjárbúskap og er búinn að gefa kindurnar en hann tekur enn þátt í að koma þeim til sumarveru í Mikley og um helgina ferjaði hann kindur og lömb út í Mikley. Kalli er aðeins farinn að skoða silunginn í firðinum og segir að mun meira æti sé innan fjarðar en var í fyrra og samkvæmt því ætti að geta orðið þokkaleg veiði. Það gæti því farið að styttast í að hægt verði að kaupa nýveiddan silung í matinn. |nl| Lesa meira

Laugardaginn 20. maí lagði lítill en vaskur hópur af stað frá tjaldstæðinu í norðankalda, var ferðinni heitið fyrir Vestrahorn. Þessi leið er mjög falleg og fjölbreytileg. Má þar meðal annars sjá rústir gömlu verslunarhúsanna við Papós, hamragirt Brunnhornið og Vestrahornið, skriður og fallega fjöru, þar sem ungir og aldnir geta grúskað um stund, einnig eru þarna rústir af Breskri herstöð, Hundagjóta og Kolbeinshellir. Í Kolbeinshelli hafðist við norðlenskur óbótamaður Kolbeinn að nafni. Hann var tekinn af lífi af skipsfélögum sínum sem réru frá Hornshöfn á Hafnartanga. Illa gekk að láta hinn látna sakamann liggja kyrran í dys sinni. Er við sitjum í rústum Bresku-herstöðvarinnar og ræðum um Kolbein og afdrif hans, sjáum við hvar vera er á sveimi lengst niður í Hafnartanga. Það flýgur um hug okkar hvort Kolbeinn sé enn á ferli. En þegar betur var að gáð var þetta hvorki Kolbeinn eða breskur hermaður, heldur þýskur ferðalangur að skoða íslenska náttúru og dýralíf á köldum vordegi. Að endingu má svo skoða bæjarhúsin á Horni. Lesa meira

Sigmundur Eyþórsson slökkviliðsstjóri Brunavarna Suðurnesja og félagar hans sem lögðu á stað hjólandi frá Keflavík eldsnemma á sunnudagsmorgun komu til Hafnar um kl 19 í gærkvöldi. Eins og fram hefur komið hér á vefnum eru þeir félagar á hringferð um landið til að safna fé til styrktar langveikum börnum undir merkinu ,,Hjólum til góðs’’. Ferðin hefur gengið afskaplega vel segir Sigmundur og þetta er ótrúlega skemmtileg upplifun, okkur er allsstaðar svo vel tekið. Við lögðum af stað frá Kirkjubæjarklaustri kl. 9.30 í morgun og fengum rosalega gott veður og fallegt, 12-13° hita og fjöllin voru svo falleg að við gleymdum okkur alveg á þessari hraðferð. Þegar við komum á brúna yfir Hornafjarðarfljót vorum við búnir að hjóla 501 km. frá því við fórum frá Keflavík. Leiðin frá Klaustri til Hafnar er lengsti áfanginn á leiðinni 201 km. Lesa meira

Fjórir lögreglu- og slökkviliðsmenn frá Suðurnesjum eru að hjóla hringinn um Ísland og safna fé fyrir langveik börn á Íslandi. Í morgun var lagt upp frá Klaustri og hjólað til Hafnar. Þetta er lengsti hluti leiðarinnar, um 200 km. Verkefnið hófst að morgni Hvítasunnudags en gert er ráð fyrir að hringferðin taki 10 daga. Í dag, þriðjudag, er þriðji dagurinn þeirra í ferðinni. Hægt er að fylgjast þeim félögum á vefslóðinni www.vf.is/hjolad. en þar rita þeir pistla sem lýsa ferðinni. Reiknað er með að ferðalangarnir verði komnir á Höfn síðdegis í dag eða undir kvöldið. Lesa meira

Krakkarnir í leikskólunum Lönguhólum og Krakkakoti fóru í sína árlegu leikskóla-skrúðgöngu, vorgönguna, í gærmorgun. Með í göngunni voru fóstrur, foreldrar og systkini og á undan göngunni fór lögreglubíll. Gengið var frá Krakkakoti út Hafnarbraut að Nýheimum þar sem stansað var um stund, sest niður, sungið og allir fengu svala að drekka og síðan var haldið inn Kirkjubraut að Lönguhólum. Þetta er í þriðja sinn sem leikskólarnir fara í vorskrúðgöngu og á hún að vera árlegur viðburður og eins og í öllum góðum skrúðgöngum voru þátttakendur í grímubúningum og furðufötum. Rúmlega hundrað börn eru í báðum leikskólunum og segir Snæfríður Svavarsdóttir leikskólastjóri í Krakkakoti að pláss sé fyrir fleiri börn. Lesa meira

Húsasmiðjan opnaði verslun sína í morgun þar sem áður var byggingavörudeild Kask. Gunnar Hermannsson ,sem verið hefur verslunarstjóri byggingavörudeildarinnar frá opnun hennar verður verslunarstjóri Húsasmiðjunnar á Höfn. Gunnar er ánægður með nýju verslunina, breytingarnar hafi gengið í gegn á örstuttum tíma og hér verður boðið upp á miklu fjölbreyttara vöruúrval. Sama verð er í verslunum Húsasmiðjunnar um allt land og þær vörur Húsasmiðjunnar sem ekki eru til staðar munum við útvega. Gunnar vill benda á að vörulisti Húsasmiðjunnar sem kom í póstinum í gær er að sjálfsögðu í fulli gildi hér og öll tilboð sömuleiðis. Lesa meira

Mörg hundruð manns hafa lagt leið sína á Vatnajökul og gengið á Hvannadalshnúk undanfarnar vikur, fleiri en nokkru sinni áður. Þetta eru alltaf að verða vinsælla og vinsælla og sumir ganga á hnúkinn árlega. Einar Sigurðsson í Hofsnesi segir að þokkalega líti út með færð á jökulinn um hvítasunnuna en snjóflóðahætta er enn, það verður að taka það með í reikninginn. Á uppstigningadag snjóaði mikið á jökulinn og þegar Einar fór á jökulinn sl.sunnudag var færi upp mjög erfitt, um 50 cm. nýfallinn snjór yfir öllu, hafði snjóað á harðan snjó, viðloðun þá var nokkuð góð en það er fljótt að breytast. Það sem gerist núna þegar hlýnar í veðri er að þessi nýja þekja þyngist svo mikið þegar hún blotnar og þá þarf ekki annað en ,,ýta á gikkinn’’ til að allt fari á stað. Einar var einn þeirra sem lagði á jökulinn til hjálpar mönnunum sem lentu í snjóflóðinu sl. þriðjudag og var kominn upp í 16-17 hundruð m.hæð þegar hann heyrði að björgunarlið væri komið á staðinn og sneri því við. Lesa meira

Frá og með 1. júní mun Húsasmiðjan taka við rekstri KASK Byggingarvörudeildar og opna breytta verslun föstudaginn 2. júní. Gunnar Hermannsson verður verslunarstjóri og starfsfólk það sem starfaði í KASK Byggingarvörudeild mun starfa við nýju verslunina áfram. Með tilkomu nýju Húsasmiðjuverslunar á Höfn eru Húsasmiðjuverslanir á landsbyggðinni orðnar alls 13, auk verslana Ískrafts og Blómavals. Ef taldar eru með verslanir Húsasmiðjunnar á höfuðborgarsvæðinu og verslunum Blómavals, H.G. Guðjónssonar og Ískrafts eru verslanirnar Húsasmiðjunnar orðnar alls 29 á landsvísu. “Við hjá Húsasmiðjunni vonum að íbúar á Höfn og nærsveitum taki þjónustunni vel og taki þátt í frekari uppbyggingu á versluninni”, segir Steinn Logi Björnsson, forstjóri Húsasmiðjunnar. Lesa meira