Skóli á grænni grein
Heimsókn fulltrúa landverndar og hreinsunardagur
Á miðvikudag kom Orri Páll Jóhannsson starfsmaður hjá Landvernd í heimsókn í Grunnskólann. Hann er jafnframt umsjónarmaður verkefnisins Skólar á grænni grein eða Grænfánaverkefnisins en skólinn okkar er þátttakandi í því verkefni. Markmið verkefnisins er að skólar bæti sig í umhverfismálum og setji sér umhverfisstefnu.
Orri byrjaði daginn á því að heimsækja Krakkakot og bekki á miðstigi skólans og ræddi við þá um umhverfismál. Eftir hádegi var hann með fund með starfsfólki skólans um Grænfánaverkefnið. Í máli hans kom m.a. fram að mikilvægt væri að allir í skólanum kæmu að mótun umhverfisstefnu skólans og að nemendur lærðu einnig lýðræðisleg vinnubrögð.
Umhverfisnefnd skólans mun á næstu vikum vinna úr þessari heimsókn Orra í skólann m.a. fara yfir umhverfisgátlista. Að því loknu verða samin markmið í umhverfismálum fyrir skólann og starfsáætlun. Umhverfisnefndin stefnir að því að sækja um Grænfánann næsta vetur en þá ætti starfið að vera komið vel á veg og umhverfisþátturinn farinn að vega þungt í skólalífinu.
Í tilefni þess að á morgun er Dagur umhverfisins tóku nemendur í 4. – 8. bekk til hendinni í bænum og tíndu rusl hver sem betur gat. Með því vilja þeir leggja sitt af mörkum til fegrunar bæjarins. Því miður rigndi töluvert á hópinn en fæstir létu það nokkuð á sig fá. Einnig fengu allir nemendur skólans að fara í sundlaugina í dag og naut það mikilla vinsælda. Víst er að nemendur og starfsfólk skólans á eftir að stunda nýju glæsilegu sundlaugina okkar af krafti.
