Um skólann

Grunnskóli Hornafjarðar var settur í fyrsta sinn 24. ágúst 2007.

Í honum stunda nemendur úr Austur Skaftafellssýslu nám fyrir utan nemendur í 1. - 8. bekk í Öræfum.

Í byrjun árs 2007 samþykkti skólanefnd og bæjarstjórn Hornafjarðar að sameina yfirstjórn grunnskólans í Hornafirði í kjölfar þess að ný skólastefna var samþykkt.  Frá 1996 höfðu þrír skólar verið starfræktir, Nesjaskóli fyrir 1. - 3. bekkur, Hafnarskóli fyrir 4. - 7. bekk og Heppuskóli fyrir 8. - 10. bekk.  Í þessum skólum voru sex stjórnendur auk sérkennslufulltrúa á Skólaskrifstofunni.  Þessir skólar voru algerlega sjálfstæðar stofnanir þrátt fyrir að í þá færu sömu nemendurnir.  

Við sameiningu skólanna var stjórnendum til að byrja með fækkað í fimm, þrjá skólastjóra sem mynduðu skólastjórn og tvo deildarstjóra, annarsvegar deildarstjóra sérkennslu og hinsvegar deildarstjóra sérstakra verkefna. Haustið 2009 var stjórnendum fækkað enn meira þegar Nesjaskóli var lagður niður og eru nú tveir skólastjórar og einn deildarstjóri sérkennslu. 

Skólastjórnin skiptir með sér verkum þvert á skólastigin auk þess sem hvor skólastjórinn sér um daglegt skipulag á sínu skólastigi. 

Húsnæði skólans dreifist töluvert. Í Hafnarskóla eru nemendur í 1. - 6. bekk. Í Heppuskóla eru nemendur í 7. - 10. bekk.  Þá er sérstakt handmenntahús við Hafnarbrautina þar sem textíl og smíðar eru kenndar.  Í lausum kennslustofum við Hafnarskóla er myndmenntin kennd og þar er heilsdagsvistunin ásamt flautukennslu og tónmennt og að sjálfsögðu sækja nemendur íþróttir í íþróttahús- sundlaug bæjarins. Sumarið 2009 voru gerðar gagngerar breytingar á elsta hluta Hafnarskóla og skólalóðunum milli Hafnar- og Heppuskóla.  Í Hafnarskóla var m.a. gerður matsalur fyrir alla nemendur skólans og skólalóðirnar tengdar saman bæði með það í huga að bæta samgöngur á milli húsanna en einnig til að tengja húsin enn betur.  Sumarið 2011 var hafist handa við gagngerar breytingar á Heppuskóla en áæltuð verklok þar eru haustið 2012.

Markmiðið með sameiningu skólanna var fyrst og fremst að bæta skólastarfið og ná meiri samfellu í námi og kennslu nemenda.  Lögð var áhersla á að efla list- og verkgreinakennslu í skólanum, að efla frumkvöðlahugsun í skólanum auk þess að efla og treysta almenna fagþekkingu starfsfólks. Þetta er langtímamarkmið sem unnið verður að í skólanum á næstu misserum.

Stefna skólans 

                                         Virðing – metnaður – vinátta – frelsi – jákvæðni

Þessi orð eru kjörorð skólans og marka grunninn að stefnu hans. Kjörorðin  tengjast náið þeirri uppeldisstefnu sem skólinn vinnur eftir, Uppeldi til ábyrgðar en sú stefna gengur út á að öll hegðun okkar sé tilkomin vegna þess að við erum að reyna að uppfylla þarfir okkar. Samkvæmt Uppeldi til ábyrgðar eru grunnþarfirnar fimm og tengjast þær náið kjörorðunum. Virðing svarar til öryggisþarfarinnar, jákvæðni svarar til gleðiþarfarinnar, vinátta til umhyggjuþarfarinnar, frelsi til frelsisþarfarinnar og metnaður til áhrifaþarfarinnar. 

Virðing. Í skólanum er lögð áhersla á að allir séu metnir að verðleikum og fái viðurkenningu á vinnu sinni og því sem þeir leggja sig fram við. Í skólanum er komið fram við alla af virðingu, kurteisi og réttlæti og lögð áhersla á að allir geti verið öruggir um að verða ekki fyrir ofbeldi eða áreiti og að unnið með það ef slíkt kemur upp. 

Metnaður. Í skólanum er lögð áhersla á að allir geri sitt besta. Markið er sett hátt, allir hafa trú hver á öðrum, fólk styður hvert annað og þar ná allir góðum árangri. Lögð er áhersla á nám við hæfi og framfarir í samræmi við forsendur hvers og eins.  

Vinátta. Í skólanum er lögð áhersla á og unnið með vináttu og umhyggju. Lögð er áhersla á kurteisi í samskiptum, að allir séu hlýlegir og leggi sig fram við að aðstoða hvern annan. Það hafa allir þörf fyrir vináttu og umhyggju og sömuleiðis hafa allir þörf fyrir að sýna vináttu og umhyggju. 

Jákvæðni. Í skólanum er lögð áhersla á jákvætt viðhorf. Allir hafa val hverju svo sem þeir standa frammi fyrir í lífinu. Að velja að vera jákvæður er léttara og eykur líkurnar á lífshamingju. Lögð er áhersla á jákvætt og hlýlegt viðmót og að fólk geti verið glatt því glöðu fólki líður vel og það afkastar meiru.   

Frelsi. Í skólanum er lögð áhersla á að hver einstaklingur hafi ákveðið frelsi og njóti réttinda sinna um leið og honum ber að sinna skyldum sínum og ganga ekki á frelsi annarra.  Þannig tvinnast réttindi og skyldur órjúfanlegum böndum við frelsishugtakið.

Sérstaða skólans

Sérstaða skólans markast af staðsetningu hans og því fjölbreytta og um leið fágæta umhverfi sem hann er í. Sveitarfélagið sem skólinn þjónar er víðfeðmt en tiltölulega fámennt með rúmlega 2000 íbúa. Íbúar sveitarfélagsins hafa vanist því í gegnum aldirnar að bjarga sér sjálfir því langt er í næstu þéttbýlisstaði og samgöngur oft erfiðar þó vissulega hafi þar orðið miklar breytingar síðustu áratugi. Höfuðatvinnugreinar sveitarfélagsins byggja á tengslum við náttúruna, annars vegar í gegnum landbúnað og sjávarútveg en hins vegar í gegnum ferðamannaiðnað.  Náttúran er líka drifkraftur í öflugu menningar- og listalífi sem veitir listamönnum innblástur til einstakrar vinnu.

Á þessum þáttum byggir sérstaða skólans. Þar er lögð mikil áhersla á tengslin við náttúruna í allri sýslunni og leyfa nemendum að njóta hennar og fræðast um hana um leið og sterk tengsl við samfélagið eru sá drifkraftur sem skólinn byggir á. Nemendur skólans fara í skipulagðar ferðir vítt og breitt um sýsluna svo þeir fái að kynnast sem flestum svæðum innan hennar. Ferðirnar eru nýttar markvisst í námi nemenda og tekur sú vinna mið af aldri og þroska þeirra. 

Nemendur kynnast helstu atvinnuvegum í samfélaginu bæði gegnum námið í skólanum og einnig með vettvangsferðum á sveitabæi og í ýmis fyrirtæki og stofnanir. Starfskynningar eru fyrir nemendur í 10. bekk þar sem flest fyrirtæki og stofnanir í sveitarfélaginu eru boðin og búin að taka við nemendum, kynna þeim starfsemi sína og leyfa þeim að taka þátt í vinnunni.  

Áhersla er lögð á list- og verknám í skólanum með sérstökum þunga á nýsköpun og frumkvöðlastarf.