Fundargerð skólanefndar 78

78. fundur

Fundur haldinn í Sindrabæ og ráðhúsinu, miðvikudaginn 25. janúar 2006 kl. 14:50

Mætt voru: Sigríður Kristinsdóttir, Elín Magnúsdóttir, Valdís Kjartansdóttir, Bryndís Hólmarsdóttir, Ólöf Þórhalla Magnúsdóttir, Íris Gísladóttir, Guðlaug Úlfarsdóttir, Rósa Valdimarsdóttir, Þorvaldur J. Viktorsson, Guðmundur Ingi Sigbjörnsson, Stefán Ólafsson. Gengið var til dagskrár og eftirfarandi tekið fyrir:

1. Verkefnið Blátt áfram ? fyrirlestur

Fyrirlesturinn var í Sindrabæ þar sem mætt var starfsfólk skólanna, starfsmenn skólaskrifstofu og skólanefndarmenn. Almenn ánægja var með fyrirlesturinn og töldu fundarmenn fulla ástæðu til að fyrirlestrar sem þessir verði haldnir reglulega.

2. Fundargerð 77. fundar

Engar athugasemdir gerðar.

3. Svör skólastjórnenda vegna fyrirspurnar á síðasta fundi

Lesin voru upp svör skólastjóra Hafnarskóla, Heppuskóla og Nesjaskóla.

Bryndís sagðist hafa verið fyrirspyrjandi á síðasta fundi. Ræddi hún röskun sem verði á kennslu við slík leyfi, af því hafi hún fyrst og fremst áhyggjur.

Þorvaldur sagði að þessi mál leysist almennt vel og sagðist vonast til að skólanefnd treysti sér til að leysa þau.

Guðmundur sagði að vissulega hafi þessi fyrirspurn valdið óánægju hjá skólastjórnendum og tók um leið undir þau orð að slík leyfi valdi einhverri röskun á skólastarfi þó að allt sé gert til að hafa röskunina sem minnsta. Þá sagði hann skólastjórnendur vera sammála um það að sýna kennurum ákveðinn sveigjanleika enda væru þeir bundnir af því að taka allt sitt leyfi að sumri til.

Guðlaug og Rósa lýstu hvernig allt sé gert í skólunum til að undirbúa slík forföll sem best enda væru þau kunn fyrirfram.

Sigríður sagði að þessari fyrirspurn væri ekki beint gegn einum eða neinum heldur vera eina af skyldum nefndarinnar að fylgjast með skólastarfi. Sagði hún jafnframt að það væri á engan hátt vilji nefndarinnar að vera með neinn núning við skólana, við þá þurfi að vera gott samstarf. Sigríður lagði fram eftirfarandi tillögu að bókun:

Skólanefnd telur svörin vera skýr og greinagóð. Nefndin telur að fjarvistir kennara vegna leyfa séu ekki meiri en búast má við. Voru skólanefndarmenn þessu sammála.

Samþykkt að formaður skólanefndar og starfsmaður nefndarinnar svari fyrirspurnum sem fram koma í bréfum skólastjórnenda. Þau svör verði borin undir nefndarmenn áður en þeim verði endanlega svarað.

Guðmundur lagði áherslu á gott samstarf skóla og skólanefndar, þau þurfi að vera í jákvæðum farvegi.

4. Erindi bæjarráðs vegna námskeiða í tengslum við fyrirhugaðar breytingar á námsskipan til stúdentsprófs.

Á 319. fundi bæjarráðs var eftirfarandi fært til bókar: ?Rætt um námskeið sem menntamálaráðuneytið hyggst standa fyrir í íslensku, dönsku, ensku og stærðfræði. Ljóst er að fari kennarar á þessi námskeið kallar það á veruleg útgjöld fyrir sveitarfélögin vegna fjarveru kennara frá vinnu í námslotum, ferðakostnaðar og dagpeninga. Er það ekki í samræmi við yfirlýsingar ráðuneytisins um að endurmenntun kennara vegna fyrirhugaðra breytinga á námi til stúdentsprófs auki ekki útgjöld sveitarfélaganna. Málinu vísað til umfjöllunar í skólanefnd.?

Í skýrslu menntamálaráðuneytisins, Breytt námsskipan til stúdentsprófs, bls. 62, segir orðrétt: ?Gera má ráð fyrir að allir kennarar 8. ? 10. bekkjar sem kenna dönsku, ensku, íslensku og stærðfræði fari á námskeið sem undirbýr þá fyrir breytingar á aðalnámskrá og viðfangsefnum þessara námsgreina. Námskeiðin verði haldin víða um land.? Í tengslum við þessar breytingar hefur nú verið boðið upp á nám í stærðfræði í Kennaraháskólanum í Reykjavík. Samkvæmt fyrirliggjandi upplýsingum er brottfall úr námskeiðinu orðið yfir 70% sem teljast verðu mun meira en eðlilegt getur talist. Vekur þetta mikla brottfall nokkurn ugg og eðlilegt að hafa áhyggjur af öðrum námskeiðum sem halda skal í tengslum við breytta námsskipan. Einnig er ástæða til að efast um að yfirlýsingar þess efnis að breytingar á námsskipan muni ekki leiða til aukins kostnaðar fyrir sveitarfélögin standist. Skólanefnd samþykkir að senda eftirfarandi fyrirspurn til menntamálaráðuneytisins:

1. Ljóst er að ekki verða haldin námskeið í öllum sveitarfélögum landsins. Því er spurt hvort menntamálaráðneytið muni greiða kostnað vegna ferðalaga kennara á námskeiðsstað og dagpeninga í samræmi við ákvæði kjarasamninga.

2. Mun ráðuneytið greiða kostnað við kennslu vegna fjarveru kennara í námslotum þegar námskeið eru haldin á starfstíma grunnskólanna?

3. Hvað hyggst ráðuneytið gera til að koma í veg fyrir verulegt brottfall úr þessum námskeiðum?

4. Hyggst ráðuneytið skylda alla grunnskóla landsins til að senda viðkomandi kennara í 8. ? 10. bekk á námskeið í dönsku, ensku, íslensku og stærðfræði?

5. Önnur mál

· Greint frá bréfi Ásatrúarfélagsins þar sem þess er farið ?á leit við fræðslu- og skólaskrifstofur Íslands að meðfylgjandi erindi, ?Kynning Ásatrúarfélagsins á heiðnum sið?, verði komið á framfæri við alla grunnskóla landsins.? Málinu vísað til starfsmanns nefndarinnar.

· Kennsla í kristnum fræðum, siðfræði og trúarbragðafræði ? samantekt menntamálráðuneytisins. Skýrsla þessi er aðgengileg á heimasíðu ráðuneytisins, www.menntamalaraduneyti.is.

· Foreldraráð í grunnskólum skólaárið 2004 ? 2005 - samantekt menntamálráðuneytisins. Skýrsla þessi er aðgengileg á heimasíðu ráðuneytisins, www.menntamalaraduneyti.is.

· Skólastefna sveitarfélagsins ? verkstaða. Stýrihópur hefur sent frá sér til vinnuhópanna þriggja 1. drög að stefnunni. Komnar eru athugasemdir frá grunnskólahópi og leikskólahópi sem ekki hafa verið teknar fyrir í stýrihópnum enn sem komið er.

· Bréf Vinnueftirlits ríkisins. Þar segir meðal annars: ?Vinnueftirlit ríkisins er að hefja vinnuverndarátak í grunnskólum landsins með það að markmiði að efla innra vinnuverndarstarf og bæta aðbúnað, hollustuhætti og líðan starfsmanna. Stefnt er að því að skipulagt vinnuverndarstarf verði komið á í öllum skólum landsins á skólaárinu 2006 ? 2007.

· Þórhalla ræddi aðgengi í Heppuskóla og tímasetningar á framkvæmdum.

Fundi slitið kl. 18:30