Fundargerð Skólanefndar 51

51. fundur

Fundur haldinn í ráðhúsinu, mánudaginn 16. júní 2003 kl. 16.10

Mætt voru: Sigríður Kristinsdóttir, Bryndís Hólmarsdóttir, Elín Magnúsdóttir, Ólöf Þórhalla Magnúsdóttir, Valdís Kjartansdóttir, Arnbjörg Stefánsdóttir, Eyrún Axelsdóttir, Jóhann Morávek og Stefán Ólafsson.

Gengið var til dagskrár og eftirfarandi tekið fyrir:

1. Fundargerð 50. fundar
Engar athugasemdir gerðar.

2. Skóladagatal Tónskólans 2003 - 2004
Jóhann Morávek gerði grein fyrir skóladagatali skólans. Skólanefnd samþykkir skóladagatalið, þar með talið að færa tvo starfsdaga af átta inn á skólaárið í stað þess að taka þá alla fyrir og eftir skólalok. Einnig er veitt heimild til að breyta 19. des. í starfsdag í stað kennsludags. Undir þessum lið greindi Jóhann frá för "Skólasveitar Hornafjarðar" (25 börn) til Akureyrar sem stóðu sig svo vel að eftir var tekið. Voru þeim veitt sérstök prúðmennskuverðlaun. (Jóhann vék af fundi)

3. Hugmyndir um framtíðarskipan skólahúsnæðis í Hafnarskóla
Arnbjörg gerði grein fyrir hugmyndum um breytingar á skólahúsnæði sem ganga út á betri nýtingu og um leið aukna hagræðingu. Í þessum tillögum er m. a. gert ráð fyrir að vinnuaðstaða kennara verði flutt á neðri hæð hússins. Núverandi kennaraaðstöðu eða elsta hluta hússins breytt í sal. Tölvuver, bókasafn og kennsla í tónmennt yrði færð á efri hæð.
Skólanefnd tekur undir flest af því sem fram kemur í tillögum skólastjórnenda Hafnarskóla og felur þeim ásamt framkvstj. sviðsins að útfæra þær nánar og láta reikna út kostnað vegna hugsanlegra breytinga. (Arnbjörg vék af fundi)

4. Ósk leikskólastjóra um sérstakan dag til símenntunar
(Eyrún Axelsdóttir, aðstoðarleikskólastjóri á Lönguhólum mætti á fundinn)
Eyrún fór yfir rökstuðning fyrir því að taka upp þriðja starfsdaginn sem einkum skyldi nýttur til endurmenntunar starfsfólks. Einnig greindi hún frá nýtingu á þeim tveimur starfsdögum sem nú eru til staðar. Vitnaði Eyrún meðal annars í áður sent bréf leikskólastjóranna, Margrétar Ingólfsdóttur og Snæfríðar Svavarsdóttur, um þriðja starfsdag á skólaári leikskólanna sem ætlaður yrði til endurmenntunar starfsfólks. Framkvstj. sviðsins hefur sent fyrirspurn um þessi mál til skólaskrifstofa vítt og breitt um landið. Níu hafa svarað fyrirspurn um málefnið og af þeim hafa fjögur sveitarfélög tekið upp þriðja starfsdaginn en fimm ekki.
Elín sagði mikilvægt að setja sig í spor foreldra, huga þyrfti að þeirra aðstöðu. Lagði jafnframt áherslu á að mikilvægt sé að nýta þá tvo skipulagsdaga sem nú eru til staðar í það sem þeim er ætlað, þ.e. undirbúning, skipulag og endurmenntun. Töluverðar umræður spunnust um endurmenntun starfsfólks, jafnt faglærðs sem ófaglærðs. Eyrún fjallaði meðal annars um sameiginleg námskeið allra leikskóla á Austurlandi. Þá sagði hún tvo skipulagsdaga ekki nægja til að skipuleggja allt skólastarf og sinna endurmenntun. Tók hún undir það sjónarmið að skiplagsdagar yrðu valdir með þeim hætti að sem minnst röskun yrði fyrir fjölskyldur þeirra barna sem eru í leikskóla. (Eyrún vék af fundi)
Skólanefnd samþykkir fyrir sitt leyti þriðja starfsdaginn að því gefnu að hann verði tekinn þegar mæting barna í leikskóla er almennt lítil. Bent er á fyrsta dag eftir sumarleyfi, dag milli jóla og nýárs eða miðvikudag fyrir páskahátíð sem heppilega daga.

5. Önnur mál
• Útlit er fyrir að 8 börn verði í Óla prik næsta skólaár.
• Kynnt bréf menntamálaráðuneytisins þar sem kannaður er áhugi á þátttöku í Olweusarverkefninu Gegn einelti. Bent á að Hafnar- og Heppuskóli eru þátttakendur í verkefninu.
• Kynnt bréf menntamálaráðuneytisins, málþing um kennslu í stærðfræði 24. og 25. október nk.
• Rætt um hvort kalla eigi eftir skóladagatölum frá öðrum sveitarfélögum til samanburðar við skóladagatal okkar skóla.



Fundi slitið kl. 18:25