Fundargerð skólanefndar 100

100. fundur

 Mætt voru:     Guðrún Jónsdóttir formaður, Ingibjörg Ævarr Steinsdóttir, Gunnar Sigurjónsson, Anna María Ríkharðsdóttir, Sigríður Kristinsdóttir, Þórgunnur Torfadóttir, Pálína Þorsteinsdóttir, Guðlaug Úlfarsdóttir, Margrét Ingólfsdóttir, Snæfríður Svavarsdóttir og Stefán Ólafsson.        

 Gengið var til dagskrár og eftirfarandi tekið fyrir:               

 1. Fundargerð 99. fundar

Engar athugasemdir gerðar.

 2. Skýrsla um starfsemi leikskólanna

Skýrslan var að mestu unnin á haustdögum 2007 og vinnu við hana lokið í janúar 2008. Miðað er við barna- og starfsmannafjölda í október 2007. Fram kemur m.a. að dvalartími barna í leikskólum á Hornafirði er að meðaltali mun skemmri en sama meðaltal á landinu öllu. 27,5% hornfirskra leikskólabarna eru í skólanum í 4 klst. á dag og 37% eru í 8 klst. eða lengur.  Árið 2006 var hlutfall barna sem voru 8 klst. eða lengur í leikskóla, m.v. allt landið, um 75%. Ekki komu fram einhlít svör við því hvers vegna hornfirsk börn eru skemur en börn almennt á landinu í leikskóla. Spurning hvort svörin er að finna í samfélagsgerðinni, þar á meðal öðrum vinnutíma, einkum kvenna. Einnig gæti stærð samfélagsins haft þar áhrif.

Ekki kemur annað fram en að starfsemi leikskólanna sé öflug og þar fari fram fjölbreytt nám. Skortur á leikskólakennurum setur þó sitt mark á starfsemi skólanna. Rætt var um álag á starfsfólk skólanna vegna þeirra starfsmanna sem eru í burtu vegna náms, veikinda og orlofs. Kom fram að staðan hafi verið með versta móti í skólunum (einnig grunnskólunum) á þessu skólaári hvað varðar forföll starfsmanna og álag sem því fylgir. Var þeirri spurningu varpað til skólanefndar hvað hún hygðist gera í þessari stöðu.   

 3. Niðurstöður samræmdra könnunarprófa í 4. og 7. bekk og niðurstöður samræmdra prófa í 10. bekk

Skýrslur Námsmatsstofnunar sýna að grunnskólarnir eru almennt um eða eitthvað fyrir neðan meðaltal landsins á árinu 2006.  Upplýst var að árangur var mun betri í 4. bekk haustið 2007 sem gæti verið vísbending um bættan árangur. Sama staða var að hluta til einnig í 7. bekk, betri 2007 en 2006. Staðan í 10. bekk var svipuð árin 2006 og 2007, þ.e. almennt eitthvað undir meðaltali, misjafnt eftir greinum. Var mikið rætt um stöðu skólanna og árangur þeirra og benti Guðlaug (fulltrúi kennara) á að starfsmenn skólanna ræddu þetta mikið sín á milli. Í því sambandi var bent á tíð kennaraskipti, of lágt hlutfall réttindakennara, samfélagsgerðina o. fl. þætti.

 4. PISA 2006 – helstu niðurstöður

Nemendur á Hornafirði eru lítillega undir meðaltali Íslands í könnuninni þótt í sumum greinum muni þar litlu. Greint var frá alþjóðlegri gagnrýni sem fram hefur komið á PISA könnunina  þar sem því er m.a. beinlínis haldið fram að slíkir annmarkar séu á henni að það hefði aldrei átt að birta hana. Sigríður benti á að rík ástæða sé til að skoða þessa þætti, sbr. lið 4 og 5 á dagskránni, og reyna að komast að því hvernig bæta má árangur skólanna.

 5. Bréf skólastjóra Grunnskólans í Hofgarði, dags. 10. janúar 2008

Í bréfi sín fjallar skólastjóri um samskipti við aðra skóla í sveitarfélaginu og við sérfræðiþjónustu skólanna. Telur skólastjóri að þar mætti betur gera, þ.e. bæta þá þjónustu sem Grunnskólinn í Hofgarði fær. Þá benti skólastjóri á að skólinn hafi ekki lengur annan lítinn grunnskóla til að eiga samstarf við og það sé eins og að vegalengdin til Hafnar hafi lengst. Óskaði skólastjóri eftir því að unnið verði skipulag þar sem ákvarðað verði með hvaða hætti þjónusta við Grunnskólann í Hofgarði verði og um leið staða hans í skólasamfélaginu.  

Starfsmaður skólanefndar útskýrði stöðu mála og minnti um leið á þær breytingar sem orðið hafa á sviðinu og í grunnskólanum. Staða sérkennslufulltrúa hafi verið lögð af sem óhjákvæmilega hafi breytt ýmsu í þjónustunni við skóla sveitarfélagsins. Þórgunnur benti á að stjórnendur Grunnskóla Hornafjarðar hafi verið mjög uppteknir við hinn nýsameinaða skóla og því lítill tími gefist til samstarfs við aðra skóla í sveitarfélaginu.  

 6. Svarbréf menntamálaráðuneytis, dags. 21. desember 2007, svar við fyrirspurn skólaskrifstofu, dags. 18. október 2007

Fram kom sú skoðun starfsmanns nefndarinnar að ekkert væri að græða á svari menntamálaráðuneytisins. Hvorki svaraði það þeim spurningum sem til þess var beint né tæki á nokkurn hátt af vafa um hvaða ferðir flokkuðust undir vettvangsnám og hvaða ferðir ekki. Sigríður lagði áherslu á að nú þurfi skólarnir að skilgreina hvaða ferðir séu vettvangsferðir og hvaða ferðir ekki. Taldi hún til dæmis að skíðaferð, skólalokaferð o.fl. sambærilegar ferðir flokkuðust hugsanlega ekki undir vettvangsferðir. Skapaðist um þetta veruleg umræða og ljóst að hugtakið vettvangsferð er erfitt að skilgreina. Kallaði skólastjóri grunnskólans eftir svörum um hvaða ferðir ætti að flokka undir vettvangsferðir en því var ekki svarað á fundinum. Sagði hún mikilvægt fyrir skólann að það væri á hreinu. Voru menn sammála að þessi mál þurfi að komast á hreint og stefnt að því að vinna að því sameiginlega. Munu starfsmenn gera tillögu að slíkri skilgreiningu.

 7. Önnur mál

Guðrún gerði að tillögu sinni að skólanefnd færi í heimsóknir í leik- og grunnskóla sveitarfélagsins. Gerði hún tillögu um að nýta tvo næstu þriðjudaga til heimsóknar í skólana og var það samþykkt. 

Fundi slitið kl. 19:00