Fundargerð Bæjarstjórnar 72

72. fundur

Fundur haldinn í Bæjarstjórn Hornafjarðar, fimmtudaginn 1. april 2004, kl. 16:00 í Ekru.
Mætt voru: Halldóra B. Jónsdóttir, Einar Karlsson, Björn E. Traustason, Elín Magnúsdóttir, Reynir Arnarson, Ólafur Sigurðsson og Þorbjörg Arnórsdóttir. Einnig Albert Eymundsson, Inga Jóna Halldórsdóttir, Ásta H. Guðmundsdóttir, Helgi Már Pálsson og Stefán Ólafsson.

Gengið var til dagskrár.

1. Fundargerðir
Bæjarráð Hornafjarðar 244. fundur 18. mars 2004
• Byggingar- og skipulagsnefnd 51. fundur 11. mars 2004.
• Félagsmálaráð Hornafjarðar 107. fundur 9. mars 2004.
• Umhverfisnefnd Hornafjarðar 42. fundur 8. mars 2004.
• Samband íslenskra sveitarfélaga 711. fundur 20. febrúar 2004 – til kynningar.

Þorbjörg ræddi verkaskiptingu milli ríkis og sveitarfélaga og þá staðreynd að oft fylgir ekki nægilegt fjármagn með verkefnum sem flytjast yfir til sveitarfélaga. Hún lagði fram eftirfarandi bókun:

„Bæjarmálafélagið Krían vekur athygli á að mjög hallar á sveitarfélögin í samskiptum þeirra við ríkisvaldið hvað varðar möguleika sveitarfélaga til uppbyggingar þjónustu og í kostnaðarskiptinu á skatttekjum sem verja á til lögbundinna verkefna.

Bæjarmálafélagið Krían hvetur bæjarstjórn Sveitarfélagsins Hornafjarðar til að beita sér af afli fyrir því að leiðrétting náist í mikilvægum málaflokkum er lúta að samskiptum, verka- og kostnaðarskiptingu ríkis og sveitarfélaga. Í því sambandi má benda á þrjá mikilvæga málaflokka er snerta Sveitarfélagið Hornafjörð:
• Kostnaðarhlutdeild ríkis og sveitarfélaga í stofnkostnaði framhaldsskóla er skilgreind að 60% sé hlutur ríkisins en 40% hlutdeild sveitarfélagsins. Þessi kostnaðarskipting stenst ekki vegna þess að ríkið greiðir sitt hlutfall út frá normum sem ekki eru raunveruleg miðað við byggingarkostnað á hverjum tíma. Sveitarfélaið Hornafjörður þarf að fá leiðréttingu á þessum hlutföllum. Við uppgjör á stofnkostnaði FAS nemur þessi munur um 40 milljónum króna.
• Samfara auknum verkefnum og skyldum hefur kostnaður við rekstur grunnskóla aukist til muna á síðustu árum og er víða um eða yfir 50% af heildarskatttekjum sveitarfélaga. Hjá Sveitarfélaginu Hornafirði er kostnaður við fræðslumál samkvæmt fjárhagsáætlun 2004, 58% af skatttekjum. Sveitarfélögin þurfa auknar tekjur til að geta staðið undir síauknum kröfum um metnaðarfullt og öflugt skólastarf, lengingu skólaárs og yfirtöku fjölmargra verkefna á svið skólamála.
• Leggj þarf til að framlög til fráveitumála verið stórlega aukin og stuðlað að jöfnuði meðal sveitarfélaga vegna mismunandi aðstæðna og breytilegs kostnaðar við að fullnægja reglugerðum EES. Miðað við núverandi tekjustofna er það fjölmörgum sveitarfélögum fjárhagslega ofviða að ljúka fræmhvæmdum innan þess tímaramma sem settur hefur verið.

Mikilvægt er að sveitarfélögin í landinu sameinist um að snúa vörn í sókn og fá aukna tekjustofna til að standa undir mikilvægum verkefnum sem aukið geta velsæld og mikilvægi þjónustu við íbúa á landsbyggðinni.“

Halldóra ræddi um mögulega aðstöðu fyrir bifhjólanotendur (motorcross). Hún hvatti til þess að leitast verði við að finna aðstöðu fyrir þessa aðila. Halldóra sagði að mörg sveitarfélög í landinu vinni að því að ná fram úrbótum í þeim atriðum sem rædd eru í bókun Kríunnar þar með talið Sveitarfélagið Hornafjörður. Áfram verði unnið að fullum krafti að því.
Þorbjörg sagði að ganga þurfi harðar fram í þessum málum en hingað til og ná til þess víðtækri samvinnu á milli sveitarfélaga. Þorbjörg gagnrýndi að það komi fyrir að minnihlutinn fái seint eða ekki fundaboð eins og með fund þann sem haldinn var í dag um eflingu sveitarstjórnarstigsins.
Reynir spurði frétta af aðalfundi Frumkvöðlaseturs Austurlands.
Bæjarstjóri ræddi verka- og tekjuskipting milli ríkis og sveitarfélaga og sagði stöðu sveitarfélaga í þeirri umræðu veika m.a. vegna þess að mörg sveitarfélög nýta ekki að fullu þá tekjustofna sem þau hafa heimild fyrir. Bæjarstjóri sagði góða vinnu vera í gangi í Frumkvöðlasetrinu og sagðist binda miklar vonir við starfsemina.
Fundargerð samþykkt.

Bæjarráð Hornafjarðar 245. fundur 25. mars 2004
• Húsnæðisnefnd Hornafjarðar 57. fundur 17. mars 2004.
• Menningarmálanefnd Hornafjarðar 55. fundur 16. mars 2004.
• Æskulýðs- og tómstundaráð 58. fundur 22. mars 2004.
Halldóra ræddi bréf frá Framkvæmdanefnd búvörusamninga og velti fyrir sér skyldum sveitarfélagsins gagnvart þeim kostnaði sem fellur til vegna gæðastýringarinnar. Hún spurði um bifreiðakaup Menningarmiðstöðvarinnar og velti í því sambandi fyrir sér heimildum forstöðumanna til fjárútláta. Halldóra fagnar þeim áhuga sem fram hefur komið á heimsókn ungmenna frá Sisimiut á Grænlandi. Þorbjörg fagnaði því að samstaða hefur náðist um staðsetningu upplýsingamiðstöðvar í Nýheimum. Hún sagðist telja að helstu sóknarfæri sveitarfélagsins til framtíðar liggji í ferðamálum. Bæjarstjóri sagði sveitarfélagið vera með samning við Búnaðarfélag A-Skaft um búfjáreftirlit. Hann sagði að leitað verði eftir því að fá búfjáreftirlitsmanninn á næsta bæjarráðsfund til að fara yfir fyrirkomulag vinnu vegna gæðastýringar. Bæjarstjóri fór yfir minnisblað forstöðumanns Menningarmiðstöðvar þar sem gerð var grein fyrir forsendum og fjármögnun bifreiðakaupanna.
Fundargerð samþykkt.

Bæjarstjórn Hornafjarðar 71. fundur, 18. mars 2004, áður samþykkt.

2. Málefni leikskólans Óla priks

Bæjarstjóri gerði ítarlega grein fyrir umfjöllun um málefni leikskólans Óla prik í nefndum og stofnunum sveitarfélagsins allt frá bæjarstjórnarfundi 6. febrúar 2003 þar sem við afgreiðslu fjárhagsáætlunar var bókað:

„Bæjarstjórn felur starfsfólki fræðslu- og félagssviðs að endurskoða skipulag og rekstur á leikskólafræðslu í sveitarfélaginu og móta nýjar tillögur um málaflokkinn ef ástæða þykir til.“

Síðan rakti bæjarstjóri hvernig málið var unnið af embættismönnum og afgreitt að lokum í skólanefnd 17. febrúar 2004 með rökstuddri tillögu sem hljóðar svo:

“Skólanefnd leggur því til við sveitarstjórn að leikskólanum Óla priki verði lokað við lok þessa skólaárs um miðjan júlí. Um leið leggur skólanefnd áherslu á að viðkomandi börnum verði tryggð leikskólapláss í leikskólunum á Höfn.”

Í umfjöllun sinni vitnaði bæjarstjóri orðrétt í skýrslu framkvæmdastjóra fræðslu- og félagssviðs dagsett 12. september 2003 þar sem m.a. segir:

“Nýta þarf betur leikskólarými í sveitarfélaginu. Því er rétt að leggja leikskólann Óla prik niður. Ýmis rök eru fyrir því að faglegt starf sé betra og fjölbreytni meiri í Krakkakoti og Lönguhólum. Benda má á að fámennið í leikskólanum kemur í veg fyrir virkt hópastarf og skortur á menntuðum leikskólastarfsmanni kemur niður á skipulagningu starfsins og faglegum stuðningi við starfsmenn. Ljóst er að öllum börnum tveggja ára og eldri verður eftir sem áður tryggð leikskólavist auk þess sem nokkrum hluta 1 – 2 ára barna býðst einnig leikskólavist. Þá er og rétt að benda á að fækkað hefur í árgöngum.”

Bæjarstjóri gerði grein fyrir mótmælum foreldra og vitnaði orðrétt í bréf undirritað af sjö foreldrum barna í leikskólanum þar sem segir m.a.:

“Við undirrituð foreldrar barna í leikskólanum Óla prik, viljum með þessu bréfi mótmæla fyrirhugaðri lokun leikskólans í júlí n.k. Vonumst við til að tillit verði tekið til afstöðu okkar í þessu máli og viljum við hér með að eftirfarandi komi fram:

• Nú eru 11 börn í leikskólanum og við sjáum fram á fjölgun á komandi hausti.
• Ólíklegt er að þau börn sem búa í dreifbýli og eiga foreldra sem ekki þurfa að sækja vinnu sína út á Höfn komi til með að sækja leikskólana á Höfn.
• Lækkun á fasteignaverði verður um leið og þjónusta í nágrenninu skerðist.
• Hvers vegna var Krakkakot byggt ? Vegna þess að það var svo langt fyrir Hafnarbúa að keyra börnin sín á leikskólann Óla prik. Á það ekki við í báðar áttir.
• Hverjar eru ástæður lokunarinnar ? Ef um er að ræða fólksfækkunina að þá þarf hún ekki að vera viðvarandi ástand og hvað gerist svo ef að það fer að fjölga aftur.
• Hver er raunverulegur sparnaður þess að loka leikskólanum ?
• Staðsetning leikskólans er einnig kostur að okkar mati þar sem börnin eru í nálægðinni við náttúruna.

Fyrir okkur þá sameinar Óli prik það sem við viljum sjá í leikskóla fyrir börnin okkar, blandaður lítill leikskóli í rólegu umhverfi í sveit.“


Bæjarstjóri nefndi nokkur atriði og rök til viðbótar þeim sem komið hafa fram nú þegar og sett hafa verið fram í umræðu um málið s.s.

• Börn á síðasta ári á Óla priki fara tvisvar í viku í Krakkakot til að undirbúa sig fyrir grunnskólagönguna. Þrátt fyrir að ýmislegt sé gert með þessum börnum í Óla priki fá þau aldrei jafngóða þjónustu að þessu leyti og þau börn sem eru í Krakkakoti.
• Þegar öll börnin eru í þessum tveimur leikskólum skapast tækifæri fyrir þau að mynda tengsl og kynni við önnur börn á leikskólaldrinum.
• Ýmis rök eru fyrir því að faglegt starf sé betra og fjölbreytni meiri í Krakkakoti og Lönguhólum.
• Allar aðstæður eru betri til leiks og starfs í stærri leikskólunum
• Fámennið í leikskólanum Óla priki kemur í veg fyrir virkt hópastarf.
• Skortur á menntuðum leikskólastarfsmanni kemur niður á skipulagningu starfsins og faglegum stuðningi við starfsmenn.
• Fjölbreyttari vistunartímar eru í boði í Krakkakoti og Lönguhólum (12 – 14 mismunandi vistunartímar frá kl. 8:00 – 17:00). Þetta sýnir sveigjanleika fyrir þá sem leikskólana nýta.
• Vegna fæðar eru litlar líkur á því að boðið verði upp á annan vistunartíma í Óla priki en frá klukkan 13 – 17.
• Sumir líta á smæð skóla sem kost. Þetta tapast við lokun Óla priks.
• Nýting á íþróttahúsi í Mánagarði er kostur.
• Vegalengd barna sem nú eru í Óla priki eykst við að sækja skóla annað, þó ekki alla sem búa mitt á milli.
• Athuga má með að samnýta skólabílana þegar það það fer saman t.d. systkin.
• Skoða hvort einhvers konar fyrirgreiðsla eigi að koma til þeirra sem eiga leikskólabörn í dreifbýlinu.


Bæjarstjóri kynnti undirskriftarsöfnun með nöfnum 148 einstaklinga þar sem lokun Óla priks er mótmælt og jafnframt bréf Önnu Egilsdóttur leikskólakennara og fyrrverandi leikskólastjóra á Óla priki þar sem hún rökstyður það álit sitt að allir leikskólar eigi að vera af sömu stærð og Óli prik.

Að lokum fór bæjarstjóri yfir þróun barnafjöld á leikskólaaldri og fjárhagslegar forsendur málsins þar sem kom fram að óbreyttur rekstur muni kosta um 7 mkr. auk óhjákvæilegs viðhalds sem mundi kosta 1 – 2 mkr. Bæjarstjóri sagði að fullyrða mætti að rekstarlegur sparnaður yrði að minnsta kosti á bilinu 4 – 5 mkr. á ári eða 8 – 10 mkr. þessi tvö ár sem verið væri að ræða um að halda starfseminni áfram. En allt bendir til að börnum í Nesjum á leikskólaaldri muni fækka verulega næstu tvö ár.


Bæjarstjóri kynnti svohljóðandi bókun meirihluta B og D-lista:

Á fundi skólanefndar skólanefnd 17. feb. 2004 var fjallað um framtíð leikskólans Óla prik og er eftirfarandi bókun úr fundargerð nefndarinnar:

“Samkvæmt upplýsingum leikskólastjóra eru 11 börn í skólanum í dag. Hefur staðan verið nánast óbreytt þetta skólaár. Eins og áður hefur komið fram og samþykkt var á fundi skólanefndar þann 17. september 2003, er skólinn nú einungis opinn eftir hádegi, þ.e. frá klukkan 13 - 17. Á fundi sínum þann 5. febrúar sl. samþykkti bæjarráð eftirfarandi bókun undir þeim lið þar sem rætt var um framtíð leikskólans Óla priks: „Í samræmi við þá stefnu sem fram kom við afgreiðslu fjárhagsáætlunar fyrir árið 2004 samþykkir bæjarráð að vísa ákvörðun um framtíð leikskólans til umfjöllunar í skólanefnd.”
Frá árinu 1998 – 2003 hefur orðið veruleg fækkun í hópi yngstu árganga í sveitarfélaginu, þ.e. aldurshópnum á 1. ári til 5 ára. Er þessi fækkun um 20% á þessu tímabili.

1998         1999         2000         2001         2002        2003
258 börn   248 börn    242 börn   222 börn   217 börn  206 börn

Í ársbyrjun 2001 var leikskólinn Krakkakot tekinn í notkun. Við það fjölgaði leikskólaplássum verulega. Fyrsta ár þessa nýja leikskóla var nýting góð en hefur síðan dregið úr henni. Er nú svo komið að í leikskólum sveitarfélagsins eru alltaf laus pláss. Við þær aðstæður er rökrétt að nýta þá leikskóla þar sem aðstæður eru bestar, bæði hvað varðar húsnæði og uppeldisaðstæður. Í reglum sveitarfélagsins um leikskóla segir: „Öll börn tveggja ára og eldri skulu eiga kost á leikskólavist og hafa þau forgang um vistun. Séu laus pláss eftir að öllum umsóknum úr þeim aldurshópi hefur verið sinnt geta börn allt niður í eins árs aldur fengið leikskólapláss.” Þrátt fyrir að leikskólaplássum fækki lítillega mun þetta markmið reglnanna nást enda fækkun barna á leikskólaaldri veruleg. Skólanefnd leggur því til við sveitarstjórn að leikskólanum Óla priki verði lokað við lok þessa skólaárs um miðjan júlí. Um leið leggur skólanefnd áherslu á að viðkomandi börnum verði tryggð leikskólapláss í leikskólunum á Höfn.”

Í framhaldi af þessari bókun hefur verið fjallað um málefni Óla prik í bæjarstjórn, bæjarráði, skólanefnd og haldinn fundur með foreldrum sem eiga börn í leikskólanum.

Meirihluti bæjarstjórnar telur að forsendur hafi ekki breyst síðan skólanefnd afgreiddi tillögu sína um lokun Óla priks 17. febrúar 2004 og leggur til að tillaga skólanefndar verði samþykkt.

Elín Magnúsdóttir sagði að börn sem nú eru á Óla priki fái vistun á leikskólunum Lönguhólum og Krakkakoti. Hún sagði þá leikskóla vera í sérhönnuðu húsnæði fyrir starfsemina og að á þeim starfi leikskólakennarar sem hún telur mjög mikilvægt. Elín sagði húsnæði leikskólans Óla priks engan veginn ásættanlegt fyrir þessa starfsemi og að hún geti ekki fallist á að setja fjármuni í viðhald á húsnæðinu þegar það liggi ljóst fyrir að starfseminni verði hætt.

Þorbjörg gagnrýndi ólýðræðisleg vinnubrögð meirihluta í málinu, sagði lítil samskipti hafa verið höfð við bæði bæjarfulltrúa minnihluta og foreldra barna á Óla priki. Hún lagði fram eftirfarandi bókun minnihluta:
„Bæjarmálafélagið Krían leggt gegn því að loka Óla prik á haustdögum 2004. Ljóst er að foreldrar í nánasta umhverfi leikskólans vilja vista börn sín í leikskólanum og að um þessar mundir eru þar 12 börn í vistun. Ástæað er til að kanna betur í samvinnu við foreldra forsendur fyrir áframhaldandi starfsemi leikskólans með tilliti til staðsetningar hans, viðhalds og þróunar en jafnframt þýðingu þess að halda uppi góðri leikskólaþjónustu sem næst heimabyggð.

Bæjarmálafélagið Krían telur varhugavert að breyta eða drag úr þjónustu í sveitarfélaginu og fækka störfum nú þegar ljóst er að alltaf fækkar íbúum Sveitarfélagsins Hornafjarðar og við eigum í vök að verjast í atvinnumálum.“

Halldóra sagði engum bæjarfulltrúa ljúft að taka ákvörðun um að loka Óla priki en þeim beri skylda að nýta fjármuni sveitarfélagsins sem best. Hún fór yfir forsendur þess að Krakkakot var byggt en það var fyrst og fremst vegna langra biðlista á þeim tíma. Hún sagði ákvörðun um lokun tekna að vandlega íhuguðu máli og mótmælti því að ekki hefðu verið viðhöfð nægilega góð vinnubrögð við málið.

Björn E. Traustason gerði grein fyrir sinni afstöðu en hann er á móti lokun Óla Priks og hefur þá ákveðið að sitja hjá.


Bæjarstjóri andmælti fullyrðingu Þorbjargar um að vinnubrögð hefðu breytst gagnvart minnihluta frá síðasta kjörtímabili.

Forseti bar upp til atkvæða tillögu skólanefndar þess efnis að leikskólanum Óla priki verði lokað við lok skólaársins eða um miðjan júlí.
Tillagan var samþykkt með 5 atkvæðum, 1 sat hjá og fulltrúi Kríunar greiddi atkvæði gegn tillögunni.

3. Fyrirspurnir
Engar

Fundi slitið kl. 19:00