Fundargerð bæjarstjórnar 87

87. fundur

Fundur haldinn í Ekru, fimmtudaginn 12. maí 2005 kl. 16:00. Mætt voru: Elín Magnúsdóttir varaforseti, Björk Pálsdóttir, Einar Karlsson, Reynir Arnarson, Ólafur Sigurðsson og Kristín G. Gestsdóttir. Einnig: Albert Eymundsson, bæjarstjóri, Hjalti Þór Vignisson, Ásta H. Guðmundsdóttir, Stefán Ólafsson og Helgi Már Pálsson.

Forseti gerði tillögu að umræða um hafnarreglugerð yrði tekin á dagskrá. Samþykkt samhljóða. Gengið var til dagskrár.

1. Fundargerðir

Bæjarráð Hornafjarðar 290. fundur 28. apríl 2005.

· Heilbrigðis- og öldrunarráð 60. fundur 20. apríl 2005.

· Skólanefnd Hornafjarðar 70. fundur 19. apríl 2005.

· Gjafa- og minningasjóður Skjólgarðs 24. fundur 20. apríl 2005.

Reynir gerði framkvæmdir við fráveitu að umtalsefni og óskaði eftir upplýsingum um stöðu við þær framkvæmdir.

Björk ræddi um fyrirhugaðar breytingar á dagvist aldraðra og spurði hvort búið væri að kynna þær hugmyndir vandlega.

Kristín óskaði eftir því að bæjarbúar yrðu upplýstir um hvað vaxtarsamningur fæli í sér.

Björn spurði um fund með Alcoa og tækifæri sem fælust í tengslum við starfsemi fyrirtækisins.

Bæjarstjóri gerði grein að afgreiðsla á dælubúnaði vegna fráveitu hafi tafist og að framkvæmdum ljúki í þessum mánuði. Þá ræddi hann hugmyndir um breytingar á dagvist aldraðra. Bæjarstjóri rifjaði upp að frá upphafi hafi verið áform um að hýsa slíka starfsemi í Ekru. Í ræðunni kom fram að hann hafi fundað með félagi eldri borgara um málið.

Hann upplýsti um hugmyndafræði að vaxtarsamningi og sagði m.a. að forstjóri Alcoa hafi fallist á að setja fulltrúa í verkefnisstjórn samningsins. Reynir gerði fund með Alcoa að umtalsefni og taldi fundinn gagnlegan og lýsti þeim tækifærum sem starfsemi fyrirtækisins hefði för með sér.

Fundargerð samþykkt.

Bæjarráð Hornafjarðar 291. fundur 6. maí l 2005.

· Félagsmálráð Hornafjarðar 126. fundur 26. apríl 2005.

· Æskulýðs- og tómstundaráð 68. fundur 25. apríl 2005.

Kristín ræddi um uppsetningu á skilti við lónsafleggjara. Þá gerði hún þörf á ruslatunnum meðfram Hafnarbraut að umtalsefni. Kristín ræddi um þörf á betri umgengni á opnun svæðum. Hún fagnaði fyrirhuguðu landsmóti lúðrasveita haustið 2006. Bæjarstjóri tók undir orð Kristínar um umgengni og þakkaði nemendum og starfsmönnum skóla fyrir vel unnin störf við ruslatínslu. Þá upplýsti hann að mál vegna upplýsingaskiltis væri í réttum farvegi og framkvæmdir væru hafnar.

Bæjarstjórn Hornafjarðar 85. fundur 27. apríl og 86. fundur 4. maí 2005 báðar fundargerðir áður samþykktar.

2. Ársreikningar 2004 ?seinni umræða

Bæjarstjóri gerði grein fyrir að engar athugasemdir hefðu komið fram vegna ársreiknings 2004 milli umræðna. Hann fór yfir nokkur atriði úr skýrslu endurskoðenda sveitarfélagsins og las upp svohljóðandi niðurstöðu skýrslunnar: ?Það er mat okkar að fjárhags- og rekstrarstaða sveitarfélagsins og fyrirtækja og stofnana þess sé viðunandi og teljum að stjórnendur sveitarfélagsins viðhafi ábyrga fjármálastjórnun við rekstur sveitarfélagsins, sem m.a. endurspeglast í litlum frávikum á milli raunkostnaðar og fjárhagsáætlunar, en einn af mælikvörðum við góða rekstur sveitarfélaga er hversu vel þeim tekst að standast áætlanir sem gerðar eru um rekstur og framkvæmdir þeirra.? Bæjarstjóri bar ársreikningana upp til samþykktar.

Kristín lýsti yfir ánægju með að niðurstaða ársreikningana væri betri en áætlanir gerðu ráð fyrir. Þá gerði hún skuldir bæjarins vegna félagslegra íbúða að umtalsefni og mikilvægt væri að unnið yrði að því laga rekstur þeirra, m.a. með viðræðum við ríkisvaldið. Bæjarstjóri upplýsti að sveitarfélög gætu sótt um fjárveitingar í sjóð til að vega upp á móti erfiðum rekstri vegna félagslegra íbúða. Hins vegar stæði sveitarfélaginu Hornafirði þetta ekki til boða vegna ekki eins slæmrar stöðu í þessum málum miðað við önnur sveitarfélög.

Ársreikningarnir samþykktir samhljóða.

3. Lögreglusamþykkt Sveitarfélagsins Hornafjarðar - fyrri umræða

Bæjarstjóri fylgdi samþykktinni úr hlaði og fór yfir uppbyggingu reglugerðarinnar.

Reynir lagði til breytingar á 21. grein þannig að í stað ?...Bannað er að leggja húsbílum til dvalar innar bæjarmarka Hafnar...? kæmi ?...Bannað er að leggja húsbílum innan bæjarmarka Hafnar í þeim tilgangi að gista í þeim??

Kristín benti á ákvæði um losun úrgangs á almannafæri í tengslum við umræðu um þörf á betri umgengni á opnum svæðum. Kristín tók undir tillögu Reynis. Þá taldi hún þörf á góðri kynningu á lögreglusamþykkt.

Vísað til seinni umræðu.

4. Hafnarreglugerð

Bæjarstjóri fylgdi reglugerðinni úr hlaði. Forseti bar reglugerðina upp til atkvæða

Samþykkt samhljóða.

 5. Fyrirspurnir

 Engar.

 Fundi slitið kl. 17.30